Արդեն տեղեկացրել ենք, որ Երևանի պետական համալսարանի (ԵՊՀ) ռեկտոր Արամ Սիմոնյանը «ժամանակավրեպ քայլ» է որակել «Հանուն գիտության զարգացման» նախաձեռնության անդամների այսօր սկսած հացադուլը։

Արամ Սիմոնյանին պատասխանել են հացադուլ անող երիտասարդներն, ովքեր ֆեյսբուքյան ուղիղ եթերում արձագանքեցին իրենց հասցեին հնչեցված մեղադրանքներին ու քննադատություններին:

Յուրի Ավագյանն անդրադարձավ Երևանի պետական համալսարանի ռեկտոր Արամ Սիմոնյանի հայտարարությանը, թե ինքը ԵՊՀ ուսանող չէ և հեռացվել է անբավարար առաջադիմության պատճառով: 

Յուրի Ավագյանը եթերում պատմեց, որ ստիպված է եղել ընդհատել ուսումը: Չնայած դրան՝ իրեն համարում է ԵՊՀ ուսանող և շարժմանն էլ որպես պետհամալսարանի ուսանող է միացել:   

«Ես ընդունվել եմ Երեւանի պետական համալսարան՝ 2013 թվականին, այնուհետեւ զորակոչվել եմ բանակ՝ չստանալով տարկետում: Վերադարձել եմ եւ ուսումս շարունակել առաջին կուրսից: Սովորել եմ երկու կուրս: Երկրորդ կուրսի երկրորդ կիսամյակում  առհասարակ չեմ մասնակցել ոչ մի քննության: Ինչի՞ համար, հարց է  առաջանում: Ես ստիպված եմ եղել աշխատել՝ իմ գոյությունը պահպանելու համար, ոնց որ շատ ու շատ ուսանողներ: Մարդիկ կան, որոնք փոխում են հեռակա, մարդիկ կան, որոնք առհասարակ չեն շարունակում ուսումը: Իմ կյանքում այնպիսի իրավիճակ է եղել, որ ես այդ ժամանակ ուղղակի ֆիզիկապես չէի կարող մասնակցել քննություններին, որովհետեւ երկուսից-երեք տեղ էի աշխատում»,- ասաց Յուրի Ավագյանը:

Շարունակելով՝ նա նշեց. «Չներկայանալու պատճառով ինձ զանգահարել են, տեղեկացրել են, որ պետք է հեռացնեն: Ես ասել եմ՝ լավ, թող հեռացումը լինի, ես թեկուզ մի տարի հետ կընկնեմ, կգամ՝ իմ ուսումը կշարունակեմ: Ես հիմա ինչ որ ասում եմ, օրինական գործընթաց է, ցանկացած ուսանող կարող է մի տարով հետ ընկնել տարբեր պատճառներով: Եթե սա (ռեկտորի հայտարարությունը-խմբ.) ինչ-որ մեսիջ էր, որ այլեւս ուսումս չեմ կարող շարունակել կամ ինչ-որ բան՝ չգիտեմ: Համենայն դեպս, ես փորձելու եմ շարունակել՝ անկախ ռեկտորի արած հայտարարությունից»:

Յուրի Ավագյանը եղել է սոցիոլոգիայի ֆակուլտետի սոցիալական աշխատանք բաժնի ուսանող:

Դավիթ Պետրոսյանն անդրադարձավ այն հայտարարություններին, ըստ որոնց՝ ուսանողների շարժումն ուղղորդվում է, ինչպես նաեւ ֆինանսավորվում Սորոսի հիմնադրամի կողմից: Դրանց հեղինակը նույնպես օրինակ ԵՊՀ ռեկտորն է: «Ես հասկանում եմ, որ մենք նեղություն ենք տալիս, ուղղակի կարիք կա, որ այդ խոսքերը, որոնք ասվել են մեր հասցեին, հիմնավորվեն: Մենք սպասում ենք այդ հիմնավորումներին: Եթե դրանք չլինեն, սպասում ենք, որ մեզնից ներողություն խնդրեն: Ուղղորդվել, ֆինանսավորվել. սրանք անհիմն վիրավորոնանքեր են, որոնք հարիր չեն մարդկանց»,- ասաց հացադուլ անող ուսանողը:

Նշենք, որ ԵՊՀ ռեկտոր Արամ Սիմոնյանը մասնավորապես ասել էր. «Մենք չենք խանգարում նրանց, ժամանակավրեպ բան է. այդքան հանդիպումներ եղան, քննարկումներ եղան, բացատրություններ եղան։ Ժամանակավրեպ քայլ է, և բացարձակ որևէ դրական հետևանք չի կարող ունենալ խնդիրների արծարծման կամ լուծման համար։ Դա իրենց խնդիրն է։ Ուսանող են, իրենց իրավունքն է մտնել լսարան, իրավունք ունեն համալսարանում լինել, մենք ոչ մի բան չենք պատրաստվում անել, ուղղակի քննաշրջան է սկսվում՝ ընթացիկ քննություններ և ստուգարքներ են, ուղղակի դրանք չխանգարվեն»:

Հիշեցնենք, որ «Հանուն գիտության զարգացման» նախաձեռնության անդամ Դավիթ Պետրոսյանն այսօր հայտարարեց, որ կրկին հացադուլ է սկսել Երևանի պետական համալսարանի ֆիզիկայի ֆակուլտետի այն նույն լսարանում, որտեղ մոտ մեկ ամիս առաջ նախաձեռնության չորս անդամների հետ հացադուլ էր անում՝ բողոքելով զինծառայության մասին օրենքի դեմ։