Մխիթարյան միաբանության անդամ, Սևրի Սամուել Մուրադյան վարժարանի և մշակութային կենտրոնի տնօրեն Հարություն Պզտիկյանն իր ֆեյսբուքյան էջում Սուրբ Զատիկի առթիվ շնորհավորական ուղերձ է հղել.
«ՍՈՒՐԲ ՅԱՐՈՒԹԵԱՆ ՅԱՂԹԱՆԱԿԸ
Յիսուսի Յարութեան պարգեւած ուրախութիւնը կը յատկանշուի որպէս ՅԱՂԹԱՆԱԿԻ տօն:
Յաղթանակ ճշմարտութեան՝ քանի Յիսուս իր Հաւատարիմներուն խոստացաւ Յարութիւն առնել, ցոյց տալու համար որ մեր Հաւատքը ունայն չէ, որ մեր յոյսը չենք դրած մեռեալի մը այլ կենդանի անձի մը որուն կեանքը այնքան հզօր է որ կրնայ ոչ միայն ժամանակաւորապէս կենդանացնել այլ նաեւ յաւիտենապէս բոլոր անոնց համար որ կը հաւատան իրեն:
«Ես եմ Յարութիւն եւ Կեանք, ով որ հաւատայ ինծի, նոյնիսկ եթէ մեռնի պիտի ապրի. եւ ով որ կ’ապրի եւ ինծի կը հաւատայ, երբեք պիտի չմեռնի» (ՅովհԺԱ, 25-26):
«Ճշմարտութեան ուրախութիւն» ըսի, քանի միայն անկեղծ եւ ուղիղ հոգիները, որ ճշմարտութիւնը կը փնտռեն աստուածային սիրով կրնան լիութեամբ վայելել Յարութեան խորհուրդը:
Անկեղծ հոգին ան է որ կ’ընդունի իր պակասութիւնները, որ ունի դարձի գալու տրամադրութիւն, եւ անկեղծօրէն կը փափաքի մաքրուիլ.
«Դուք մաքրուեցէք հին խմորէն եղէք նոր զանգուածը քանի որ անխմոր էք: Որովհետեւ Քրիստոս մեր Զատիկը զոհուեցաւ: Տօն կատարենք ոչ թէ հին խմորով, կամ չարութեան եւ անզգամութեան խմորով՝ այլ սրբութեան եւ ճշմարտութեան անխմոր Հացով» (Ա Կոր 5, 7):
Հետաքրքրական էր որ Իւղաբեր կանայք Յիսուսի գերեզմանին կը մօտենան իրարու հարց տալով թէ ո՞վ պիտի վերցնէ ծանր գերեզմանաքարը… չեն ընկրկիր, կը շարունակեն յառաջանալ.
«եւ ահա երկրաշարժ մը տեղի ունեցաւ: Աստուծոյ հրեշտակը իջաւ երկինքէն, քարը գլորեց եւ վրան նստաւ (Մտթ 28, 2):
Մեզմէ ո՞վ չի փափաքիր իր կեանքի ընթացքին փնտռել եւ գտնել Յարուցեալը…
թերեւս երկար ատեն է զայն կը փնտռենք լի մտահոգութիւններով թէ ո՞վ պիտի վերցնէ ծանր գերեզմանաքարը… որպէսզի ամբողջովին իրեն նուիրուինք. բայց քանի իր շնորհքները կը վայելենք եւ զԻնք կ’ուզենք գտնել, Աստուածային նախախնամութիւնը կ’օգնէ մեզի որ ամենածանր քարերն ալ հեռացնենք մեր փակ հոգիներէն եւ յաղթահարել դժուարութիւնները աստիճանաւոր կերպով մեր ամբողջ կեանքի ընթացքին:
Փնտռել զՔրիստոս իւղաբեր կանանց նման, յարատեւօրէն մտահոգուիլ զԻնք գտնելու համար, վստահելով Աստուծոյ օգնութեան, քանի ուր մեր ուժերը անբաւարար են Ինք կը գործէ մեր փոխարէն:
Յիսուսի Ս. Յարութեան տօնը մեր հոգեւոր կեանքին մէջ ամէն տարի Աստուծոյ փնտռտուքի վերանորոգում թո՛ղ ըլլայ:
Ամէն տարի քայլ մը աւելի մօտենանք Իրեն:
ՔՐԻՍՏՈՍ ՅԱՐԵԱՒ Ի ՄԵՌԵԼՈՑ - ՕՐՀՆԵԱԼ Է ՅԱՐՈՒԹԻՒՆՆ ՔՐԻՍՏՈՍԻ
Այս առիթով կը շնորհաւորեմ մեր ԲՈԼՈՐ ՅԱՐՈՒԹԻՒՆՆԵՐԸ - ՅԱՐՈՒԹ-ները – ԱՐԹՕ- ները – ԱՐԹՈՒՐ- ները
և համայն ՅԱՐՈՒԹԻՒՆ ԱՌԱԾ ՀԱՅՈՒԹԻՒՆԸ որ Աստուածային ամենամեծ ՀՐԱՇՔՆ Է : ան ԿԱՅ – ՊԻՏԻ ԼԻՆԻ –
և ԴԵՌ ԲԱԶՄԱՆԱՅ որ մարդկութիւնը իմանայ որ ՀԱՅԸ ոչ միայն ԱՌԱՋԻՆ ՔՐԻՍՏՈՆԵԱՅ ԱԶԳՆ Է - ՏՈԿՈՒՆ Է,
և հակառակ իր բազմաթիւ անառակ որդիներուն – Աստուած բազուկները բացած պիտի ընդունի զինք շնորհիւ իր
ԲԻՒՐԱՒՈՐ ՆԱՀԱՏԱԿՆԵՐՈՒՆ ԹԱՓԱԾ ԱՐԻՒՆԻՆ որոնք երկինքէն կը հսկեն մեր ամէն մէկ քայլին: ԱՄԷՆ »:
