Հարցազրույց՝ սկանդալային նկարչուհի Էմմա Թումանյանի հետ:

Որքանո՞վ է հնարավոր գույնով արտահայտել մարդու հոգեվիճակը: 

Գույնը ամենուր է, բոլոր գացմունքերի մեջ գույն կա, յուրաքանչյուր միտք ու հոգեվիճակ իր գույնն ունի: Աշխարհն առանց գույների հնարավոր չէ պատկերացնել: Երբ ուզում ենք ասել, որ մարդը դժբախտ է, ասում ենք՝ նա անգույն ժպիտ ունի, կամ աշխարհը գունազրկվեց նրա համար: Այսինքն գույնը ուրախության, սիրո և երջանկության արտահայտությունն է: Եվ հենց գույներով է հնարավոր արտահայտել մարդու հոգեվիճակը: 

Դու երիտասարդ ես ու պիտի գերիշխեն քեզ մոտ լույսն ու երազանքները , բայց կարծես ցավ ու կսկիծ կա քո նկարներում : 

Իմ նկարներում մեզ շրջապատող կյանքն է իր բոլոր կողմերով: Մեր այսօրվա կյանքում, ցավոք, շատ է ցավն ու կսկիծը: Ամեն քայլափոխի հանդիպում ես խնդիրների ու հոգսերի բեռի տաք կքած մարդկանց, հանդիպում ես արտագաղթի մասին մտմտող, օրվա հացի խնդիր լուծող հայերի: Այդ ամենը , ինչպես յուրքանչյուրին, այնպես էլ ինձ, չի կարող անտարբեր թողնել: Ես դրանք խորն եմ ապրում ու ծնվում են իրականւթյունը արտացոլող նկարներ: 

Ցասումը, բողոքն ու զարույթն արտահայտելու համար ո՞ր ոճն ու գույներն են նախընտրելի 

Ինչպես մեդալն ունի երկու կողմ, այնպես էլ բոլոր զգացմունքները ունեն երկու երես, երկու կողմ, երկու ծայր: Եթե կա բողոք, ուրեմն կա նաև համակերպում, եթե կա զայրույթ, ուրեմն հեռու չէ նաև ներումը, ինչպես սիրո հետ համքայլ է ատելությունը… Երբ շատ զայրացած եմ լինում ներկում եմ ՛՛սևը կարմիրի համադրումով ՛՛: Բայց ընդհանրապես գույները ինձ մոտ վերածվում են խաղի և կախված այն բանից, թե որքան զայրույթ եմ արտահայտում և որքան թախիծ՝ փոխվում է այս կամ այն գույնի նրբերանգը:

Իսկ սե՞րը. Ի՞նչ գույն ունի սերը: 

Սերը… բոլոր տաք գույները սեր են … ալ կարմիրը, երկնագունը, սպիտակը… երբ գույնը սկսում է ժպտալ, ուրեմն նա սեր է: 

Բավականին շատ են նկարները, նվիրում ես, թե՞ վաճառում:

Oգոստոսի 26-ից սկսած՝ ցուցահանդեսի ավարտից հետո, կտավներս հանվում է վաճառքի: Առանց դրա նկարիչը չի կարող կենսունակ աշխատել:

Հիմնականում ովքե՞ր են գնորդները:

Նրանք, ում համար արվեստն առաջին տեղում է:

Լ.Արշակյան