Life.panorama.am-ը գրում է. Ընդամենը օրեր հետո «Ժողովրդական երգիչ 1» նախագծի հաղթող Սևակ Ամրոյանն իր երկրպագուների դատին կհանձնի իր նոր տեսահոլովակը, որը նկարահանված է հայտնի «Յար, բոյիդ մեռնեմ» ժողովրդական երգի հիման վրա:
«Երգը փորձել ենք նոր ձևով գործիքավորել և ներկայացնել հանրությանը: Գործիքավորումը կատարել է Գարեգին Առաքելյանը, իսկ միքսն ու մասթերինգն արել է Դեր Հովան»,-մեզ հետ զրույցում պատմեց Սևակ Ամրոյանը:
Երգչի նոր տեսահոլովակի հիմքում ընկած է սիրո գաղափարը, սակայն տեսարանների գերակշռող մասը հարսանեկան են: Տեսահոլովակի ռեժիսորը Մարիամ Գևորգյան է, ում հետ Սևակը մեկ անգամ չէ, որ հասցրել է համագործակցել:
Սևակ Ամրոյանի հետ զրույցում հետաքրքրվեցինք նաև նրա պրոդյուսերի` Ալեքսանդր Մհերյանի, կողմից արված մի մակագրության մասին, որը վերջինս արել էր Սևակի և նրա տեսահոլովակի հերոսուհու` պարուհի Էլեն Սանդալջյանի համատեղ լուսանկարի տակ: Տվյալ մակագրությամբ, որը կարճ ժամանակ հետո փոխարինվեց «Շուտով, նոր տեսահոլովակ» մակագրությամբ, Ալեքսանդր Մհերյանը շնորհավորել էր Սևակին և Էլենին ամուսնության կապակցությամբ:
«Ի սկզբանե` Ալեքսանդրի շնորհավորանքը հենց իր միտքն է եղել: Չենք փորձել ավելորդ ուշադրություն գրավել, դա պարզապես որպես հումոր է արված եղել: Հետո, սակայն, անձամբ խնդրեցի պրոդյուսերիս փոխարինել տվյալ մակագրությունը մեկ ուրիշով, որպեսզի թյուրիմացություն չլինի»,- պարզաբանեց Սևակը` նշելով, որ շատ մարդիկ սխալ էին հասկացել և լուրջ ընդունել Սևակի ամուսնությանը վերաբերող հումորը. «Գտնվեցին մարդիկ, ովքեր անգամ զանգահարեցին և շնորհավորեցին ինձ, իսկ ոմանք էլ նույնիսկ հասցրեցին նեղանալ ինձանից»,- պատմեց Սևակ Ամրոյանը:
Նյութը՝սկզբնաղբյուր կայքում
