«Հրապարակի» զրուցակիցն «Իրազեկ քաղաքացիների միավորում» հասարակական կազմակերպության նախագահ Դանիել Իոաննիսյանն է:
- Թրամփի՝ իշխանության գալուց հետո USAID-ից ֆինանսավորվող բոլոր հասարակական կազմակերպություննեը, լրատվամիջոցները ֆինանսական խնդիրների առջեւ կանգնեցին: «Ամերիկայի ձայնը» փակվեց, անգամ «Ազատություն» ռադիոկայանը կանգնած է փակման վտանգի առաջ: Ձեր ղեկավարած Փաստերի ստուգման հարթակը, FIP.am-ն այսօր ի՞նչ ֆինանսական խնդիրների առաջ է կանգնած:
- «Իրազեկ քաղաքացիների միավորման» փաստերի ստուգման հարթակն ավելի շատ բաց, հրապարակային, թափանցիկ ֆինանսավորում ունի, քան որոշ լրատվամիջոցներ: Մեզ մոտ հրապարակված են ֆինանսական բոլոր տարեկան զեկույցները, ինֆորմացիաները եւ այլն, ոչ մի գաղտնի բան մեզ մոտ չկա:
- ԱՄՆ նախագահ Դոնալդ Թրամփի որոշումներն ազդե՞լ են ձեր ֆինանսական վիճակի վրա:
- Խի՞ չեն ազդել, ազդել են, բայց՝ քիչ: «Իրազեկ քաղաքացիների միավորման» ընդհանուր բյուջեի մոտավորապես 25 տոկոսի չափով ենք տուժել միայն:
- Ձեր կայքում հայտարարություն կար՝ դրամահավաք էիք սկսել, ստացվե՞ց՝ ինչ-որ չափով գումար հավաքել:
- Այո, այսօր էլ էինք դրամահավաք անում, նոր տեսանյութ ենք հրապարակել, այո, ամեն ինչ ստացվում է, տարբեր քաղաքացիներ բաժանորդագրվում են: Մեկը` ամսական կտրվածքով 5 հազար դրամ է փոխանցում, մարդ կա` 25 հազար դրամ, մարդ կա՝ դրանից քիչ կամ շատ, գումարների թիվը մոտավորապես այս չափով է, սակայն մարդկանց քանակը շատ է, եւ իրականում դա լավ է, ճիշտ կուլտուրա է: Դանդաղ, տարիների ընթացքում մենք կհասնենք նրան, որ ՀՀ քաղաքացիները դրամահավաքների միջոցով կֆինանսավորեն մեր գործունեությունը:
- Օրինակ՝ «Ազատություն» ռադիոկայանում կրճատումներ են եղել: Ձեզ մոտ ինչպե՞ս է պատկերը: Շարունակո՞ւմ եք բնականոն աշխատանքը:
- «Իրազեկ քաղաքացիների միավորումն» ու Փաստերի ստուգման հարթակը շարունակում է իր բնականոն աշխատանքը, նախորդ շաբաթ միջոցառում ենք ունեցել, առաջիկա ուրբաթ օրը եւս կլինի միջոցառում, այնպես որ՝ մեր օֆիսում աշխատանքը եռում է:
- Ձեզ մոտ կանգնած աղբյուրներից պնդում են, որ ձեզ ֆինանսավորելու է գործարար Սամվել Ալեքսանյանը:
- Սամվել Ալեքսանյա՞նն է մեզ ֆինանսավորելու, Սամվել Ալեքսանյանը չէ՝ Ադոլֆ Հիտլերը, սպասում ենք նրան....
- Այո, ասում են՝ իշխանությունների հանձնարարությամբ Սամվել Ալեքսանյանը ստանձնել է ձեր ֆինանսավորումը, հայտնի է, որ նա սիրով ծառայություններ է մատուցում բոլոր գործող իշխանություններին:
- Լավ, Ադոլֆ Հիտլերը չէ, եկեք այլ միջազգային հանցագործի անուն մտածենք:
- Բայց Սամվել Ալեքսանյանը միջազգային հանցագործ չէ, ընդամենը իշխանական գործարար է:
- Մենք նրանից ֆինանսավորում չունենք, ես առաջին անգամ եմ լսում այդ մասին: Մեր բոլոր ֆինանսական աղբյուրները բաց են եւ թափանցիկ: Տարեկան հաշվետվության մեջ ամեն ինչ կա, մենք ոչինչ չենք կարող թաքցնել, չենք էլ ուզում թաքցնել:
- Ինչո՞ւ եք վիրավորում Ալեքսանյանին` համեմատում Հիտլերի հետ, Ձեր գաղափարներին դե՞մ եք համարում, որ Ալեքսանյանը ֆինանսավորի ձեզ:
- Եթե ուզում է, Սամվել Ալեքսանյանն էլ կարող է մեր կայքում բաժանորդագրվել եւ ամսական 10 հազար դրամ գումար փոխանցել մեզ:
- Իսկ եթե նրան ասեն, որ ավելի մեծ աջակցություն պետք է տրամադրի ձեզ... այսպես ասած` բարեգործական հիմունքներով...
- Շատ կարեւոր է հասկանալ, թե ինչու պետք է նման բան լինի: Եթե ֆինանսական մեծ աջակցություն ես վերցնում, պետք է հասկանաս՝ տվյալ մարդու հետ գաղափարակի՞ց ես, թե՞ ոչ, եւ ինչո՞ւ է ինքը ֆինանսավորում քեզ: Չեմ կարծում, որ ես ու Սամվել Ալեքսանյանը գաղափարակիցներ ենք:
- Բայց ո՞րն է Ալեքսանյանի գաղափարը, մարդը մշտապես ծառայում է օրվա իշխանություններին, անկախ նրանից, թե ով է իշխանության ղեկին:
- Բա դա ի՞նչ կապ ունի մեր գաղափարների հետ: Մենք ունենք հստակ գաղափարներ: Սամվել Ալեքսանյանը մեզ չի ֆինանսավորում, ազնիվ խոսք, առաջին անգամ եմ լսում այդ մասին, եթե ինչ-որ բան լինի, կտեսնեք, չեմ էլ կարող թաքցնել:
- Ինչո՞ւ չեք կարող:
- Ո՞նց պիտի թաքցնեմ:
- Ուղղակի չհրապարակելով....
- Բայց մեր կանոնադրությամբ գրված է, որ պետք է հրապարակենք: Փոքր մուտքերը` 10-20 հազար, չենք հրապարակում, բայց մեծ հոսքերը, բնականաբար, հրապարակվում են: Մենք լուրջ կառույց ենք, դուքան չենք, մեզ մոտ ամեն ինչ բանկային փոխանցումներով է արվում, մինչեւ վերջին լուման գրանցում ենք, հայտարարագրում ենք, հարկեր ենք վճարում, աշխատողների աշխատավարձերը սպիտակով են` օֆիսի վճարից մինչեւ ամեն տեսակի վճար անում ենք բանկային փոխանցումներով: Մեր ելքերը, ծախսերը միայն փաստաթղթավորված են: Ոչինչ չենք կարող թաքցնել, ոչ էլ ուզում ենք թաքցնել:
