Երեւանի ավագանու այսօրվա արտահերթ նիստում, որը վարել է քաղաքապետ Տարոն Մարգարյանը, որոշվել է Երեւան համայնքի սեփականությունը հանդիսացող 2 բնակարան անհատույց սեփականության իրավունքով օտարել 2016 թվականի հուլիսին ՀՀ ոստիկանության պարեկապահակային ծառայության գնդի տարածքում զոհված երկու ոստիկանների ընտանիքներին:
Ըստ այդմ, մայրաքաղաքի Սիսակյան փողոցի 16 շենքի համար 29՝ 60.3 քմ մակերեսով բնակարանն անհատույց սեփականության իրավունքով հատկացվել է ոստիկանության զորքերի զինծառայող, լեյտենանտ Յուրի Տեփանոսյանի այրուն՝ Արփինե Թումասյանին եւ նրա երեխաներին՝ Էլեն, Աշխեն եւ Կարեն Տեփանոսյաններին:
Սիսակյան փողոցի 16 շենքի համար 105՝ 60.3 քմ մակերեսով բնակարանն անհատույց սեփականության իրավունքով հատկացվել է ոստիկանության ավագ ենթասպա Գագիկ Մկրտչյանի այրուն՝ Հասմիկ Ոսկանյանին եւ որդուն՝ Մհեր Մկրտչյանին:
Որոշման նախագիծը ներկայացնելիս նշվել է, որ զոհված ոստիկաններն իրենց ընտանիքներով չեն ունեցել սեփական բնակարան եւ Երեւանում բնակվել են վարձակալական հիմունքներով:
