«Հրապարակը» գրում է. Արվեստագետ, արտիստ Գրիգոր Խաչատրյանն, արձագանքելով «Ելք» դաշինքի՝ Երեւանի փողոցների անվանափոխության նախաձեռնության վերաբերյալ մեր հարցին, իրեն բնորոշ ոճով նշեց․ «Պետք է գնդակահարել Նիկոլ Փաշինյանին և «Ելք»-ի բոլոր անդամներին, Փողոցների անվանափոխության նախաձեռնության համար, Թումանյանի տուն թանգարանի տնօրեն Նարինե Թուխիկյանին, որ համարձակվել է առանց նախարարին տեղյակ պահելու ինչ որ /Խավարում/ ցուցադրություն անել, դրանից լյուստրացիայի հոտ է գալիս: Մեր ժամանակ գլավլիտ կար բան կար և ոչ ոք ոչինչ չէր կարող անել առանց վերադասին ներկայացնելու, տեղյակ պահելու: Երկիրն անդունդ է գլորվում, նրանք ստվեր են գցում հայ-ռուսական դարավոր բարեկամության վրա՝ մոռանալով երկրի, Արցախի անվտանգության խնդիրները, սա հայրենիքի դավաճանություն է, մա՛հ հայրենիքի դավաճաններին, կեցցե՛ Հանրապետական կուսակցությունը և նրա մշտարթուն նախագահը, որն առաջնորդում է մեզ դեպի կոմունիզմ»: Գրիգոր Խաչատրյանը հայտնի է ոչ միայն իր հետաքրքիր, հումորով հագեցած մտքերով, այլեւ՝ ակցիաներով։ Իր նկարներով նա հայտնի էր դարձել դեռեւս 80-ականներին, «Գարուն» ամսագրից։ Նա ժամանակին սահմանել էր մրցանակ՝ Գրիգոր Խաչատրյանի անունով, եւ մրցանակը տալիս էր նրան, ով իր հետ գրկախառնվում էր։ Նրա մասին ընկերները հումորով արտահայտվում են՝ նշելով «Ես Գրիգոր Խաչատրյանի ժամանակակիցն եմ»։