Գիշերը հրդեհվել է «Երկիր Ծիրանի» կուսակցության նախագահ, փաստաբան Զարուհի Փոստանջյանի ամուսնու ավտոմեքենան։
Մանրամասներ իմանալու նպատակով Լուրեր.com-ը կապ է հաստատել Զարուհի Փոստանջյանի հետ, որն ասաց՝ հետևանքները կարող էին շատ ավելի ցավոտ լինեին՝ կարող էր պայթել վերևում գտնվող գազատար խողովակը, սակայն այրվել է միայն ամուսնու և դրա կողքին գտնվող ավտոմեքենան:
Մեր այն հարցին, թե կասկածում է արդյոք որևէ մեկին, որը կարող էր նման կերպ վարվել, պատասխանեց. «Ես և ամուսինս ոչ մի անձնական թշնամի չունենք, որ գար մեր ավտոմեքենան պայթեցներ: Հստակ է, որ այդ քայլը ունի քաղաքական նպատակներ»,- ասել է Փոստանջյանը՝ նման արարքի մեջ կասկածելով միայն ներկայիս իշխանությանը.
«Նման վայրագություն և համարձակություն կարող էր ունենալ միայն այսօրվա զավթիչ իշխանությունը, հակառակ դեպքում՝ էլ ո՞վ կարող էր նման բան անել»:
Նա համոզված է, որ մեքենայի պայթեցման նպատակը նրան լռեցնելն է, սակայն այն համոզմունքն ունի, որ դա չի հաջողվի. «Եթե հաշվարկենք, թե ինչ է տեղի ունենում իմ նկատմամբ և՛ քրեական հետապնդում, և՛ քաղաքացիական հայց, և՛ վարչական վարույթ, հասականալի է դառնում, որ այսօր գիշերը տեղի ունեցածը ֆիլմի շարունակությունն է»,- ասել է Զարուհի Փոստանջյանը՝ հավելելով, որ իրեն ոչ ոք չի կարող փոխել՝ լռեցնել:
