«Դատարանը հոկտեմբերի 3-ին կհրապարակի դատավճիռը։ Կանխատեսում եմ, որ ազատազրկում է տալու»,- Միքայել Սրբազանի գործով դատական նիստից հետո, լրագրողների հետ զրույցում, ասաց պաշտպան Արա Զոհրաբյանը։
«Դատախազը միջնորդեց 2 տարի 6 ամիս ժամկետով ազատազրկում։ Դատավորը գուցե մարդասիրական վերաբերմունք ցուցաբերի և 2 տարի սահմանի, գուցե 2,6 տարի թողնի»,- ասաց Զոհրաբյանը՝ հավելելով, որ դատավորի քայլերը թելադրված են և որոշումները դատարանի շենքում չեն կայացվում։
Փաստաբան Երեմ Սարգսյանի խոսքով առաջադրված հոդվածը 5 տարբեր տեսակի պատիժներ է ենթադրում, բայց նրանք ազատազրկում պահանջեցին․ «Ակնհայտ է, որ սա քաղաքական հետապնդում է և կոնկրետ հանձնարարություն»,- նշեց Սարգսյանը։

***

«Միքայել Սրբազանը մեզ թույլ չի տվել, որպեսզի մեղմացնող հանգամանքներ վկայակոչենք»,- լրացուցիչ դատական լսումից հետո լրագրողներին հայտնեց փաստաբան Երեմ Սարգսյանը։ Նշենք, որ այսօր քննարկվում էր Սրբազանի պատժամիջոցի և ժամկետների հարցը։ Հանրային մեղադրողը միջնորդեց 2 տարի 6 ամիս ժամկետով ազատազրկում։
Փաստաբանի խոսքով նրանք կարող էին Սրբազանի առողջական վիճակը որպես մեղմացուցիչ հանգամանք ներկայացնել, սակայն դատարանից որևէ բան հայցելու խնդիր ի սկզբանե չեն ունեցել․ «Առողջական վիճակի մասին հիմա էլ ոչինչ չեմ ասի, որովհետև թույլտվություն չունեմ»,- ասաց Սարգսյանը։
Փաստաբան Արա Զոհրաբյանի խոսքով, այո՛, Սրբազանն առողջական որոշ խնդիրներ ունի, որոնց մասին չի կարող հրապարակել, սակայն, եթե պարզվի, որ նրա կյանքին վտանգ է սպառնում, իրենք Սրբազանին չեն լսելու և հանգամանքը ներկայացնելու են դատարան։

Երևան քաղաքի առաջին ատյանի ընդհանուր իրավասության քրեական դատարանի Ավանի նստավայրում Միքայել Սրբազանի գործով լրացուցիչ դատալսումն է։

Հիշեցնենք՝ Սրբազանը մեղավոր է ճանաչվել։ Այսօր քննարկվում են պատժի տեսակի և չափի վերաբերյալ մի շարք հարցեր։
Դատախազը 2,6 ժամկետով ազատազրկում պահանջեց՝ հաշվանցելով նրա կողմից փաստացի կալանքի տակ գտնվելու ժամանակահատվածը։ «Եթե որոշեք ազատազրկել, ապա պետք է հիմնավորեք, թե ինչո՞ւ հնարավոր չէ կիրառել այս հոդվածով նախատեսված մյուս պատժի տեսակները՝ տուգանք կամ հանրային աշխատանք»,- դիմելով դատարանին՝ ասաց փաստաբան Երեմ Սարգսյանը։

Նշենք, որ Միքայել Սրբազանի նկատմամբ հարուցվել է հանրային քրեական հետապնդում՝ Քրեական օրենսգրքի 422-րդ հոդվածի 2-րդ մասով (իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերը):