Մայր աթոռի տեղեկատվական համակարգի տնօրեն Տեր Վահրամ քահանա Մելիքյանն այսօր՝ լրագրողների հետ հանդիպման ժամանակ տեղեկացրեց, որ Մայր Աթոռը հանդես է եկել մի քանի նախաձեռնություններով.
«Առաջինը մեր ռեսուրսների համախմբումն էր: Հոգևորականների մեծ մասը մեկնեց Արցախ և ծառայությունը շարունակեց տարբեր զորամասերում ու առաջնագծում՝ լինելով մեր զինվորների կողքին: Առաջիկա օրերին Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը կայցելի Արցախ: Արցախ մեկնելու ցանկություն է հայտնել նաև Ն.Ս.Օ.Տ.Տ. Մեծի Տանն Կիլիկիոյ Արամ Ա. Կաթողիկոսը: Մայր Աթոռը ստեղծել է նաև Արցախի զորակցության հիմնադրամ և նյութական օժանդակություն է ցուցաբերվելու ինչպես նահատակված հայորդիների, այնպես էլ վիրավորների ընտանիքներին: Երեկ կեսօրին հանդես եկանք կոչով և մեկ օրում կարողացանք հանգանակել 350.000 դոլար: Որոշակի միջոցներ ուղղվելու են ավերված բնակավայրերի վերականգնմանը»,-նշեց Տեր Վահրամ քահանա Մելիքյանը:
Անի Կարապետյան
