Սեպտեմբերի 21-ին  LOFT  ինքնազարգացման և ժամանցի կենտրոնում տեղի է  ունեցել Նյու Յորքից ժամանած երգահան, երաժիշտ Արմեն Ջ. Մեսչյանի հեղինակային երգերի  երեկոն: Վերջինս հեղինակ-կատարող Արթուր Մեսչյանի որդին է, սակայն ուշագրավն այն է, որ նախքան համերգն Արմեն Մեսչյանը խնդրել էր կազմակերպիչներին չհրապարակել իր ազգանունը: 

Ըստ կազմակերպիչների` այդ ձևով Արմեն Մեսչյանը չէր ցանկանում, որ  հանդիսատեսը համերգին գար միայն իր ազգանվան համար, առավել ևս, որ իր և Արթուր Մեսչյանի ստեղծագործությունները տարբեր են:

Նշենք, որ Արմեն Մեսչյանի մատուցած երաժշտությունը, իսկապես, տարբերվում է ոչ միայն ոճային առումով, այլև` լեզվական տարբերությամբ: Արմենն իր հեղինակային երգերը ներկայացնում է անգլերենով, քանի որ Նյու Յորքում  բնակվելն  անդրադարձել է նաև նրա երաժշտական մտածողության վրա:

Ի դեպ` երաժշտի հետ տվյալ հանդիպումը բացառիկ էր, քանի որ վերջինս, ըստ կազմակերպիչների` Հայաստան է այցելում իր հարազատներին տեսնելու և հանգստանալու նպատակով:  

Հավելենք, որ Նյու Յորքում Արմեն Մեսչյանը բնակվում է 1989 թվ-ից:  Իր երևանյան համերգից ժամեր անց  էլ կրկին վերադարձել է ԱՄՆ:

Հավելենք, որ LOFT ինքնազարգացման և ժամանցի կենտրոնում նմանատիպ երաժշտական երեկոները շարունակական բնույթ են կրելու:

Հեղինակ` Լիլիթ Հակոբյան