Խարկովում կայացած բռնցքամարտի Եվրոպայի առաջնության չեմպիոն Հովհաննես Բաչկովն (64 կգ քաշային կարգ) այսօր հանդիպել է լրագրողներին:
«Բոլորին էլ հայտնի է, թե ինչ պատճառներով չէր ստացվում նախկինում մեդալ նվաճել: Թե՛ մրցավարական խոչընդոտներ կային, թե՛ մարզավիճակի: Այս անգամ երկուսն էլ կարգին էին: Թիմային համախմբվածության շնորհիվ կարողացանք հաղթանակ գրանցել»,-ասաց Բաչկովը՝ հավելելով.
«Այն միտքը, որ մեդալ չէի նվաճել, ինձ տանջում էր: Չէի կարող պրոֆեսիոնալ ռինգ տեղափոխվել՝ առանց սիրողական ռինգում մեդալ նվաճելու: Իմ տարիների ամբողջ աշխատանքը պետք էր ամփոփել Եվրոպայի կամ աշխարհի առաջնությունում մեդալ նվաճելով, չեմպիոն դառնալով: Դա էր ինձ ուժ և մոտիվացիա տալիս»:
