Armlur.am-ը հարցազրույց ունի պարուհի, պարուսույց, դերասանուհի Սոֆի Դեւոյանի հետ: Զրույցից մի հատված ներկայացնում ենք ստորև.
-Տիկի՛ն Դեւոյան, տեղյակ եմ, որ այս շրջանում տարբեր հեռուստանախագծերում հանդես գալու առաջարկներ եք ստացել, Ձեզ էլի սերիալում կտեսնե՞նք:
-Այո՛, առաջիկայում «Կենտրոն» հեռուստաընկերությամբ մեկնարկելու է նոր սերիալ, որտեղ խաղալու եմ նաեւ ես: Այդ նախագծի մասին մանրամասներ հայտնել չեմ կարող: Իսկ, առհասարակ, վերջին շրջանում Հայաստանում, ԱՄՆ-ում իրականացվող մի շարք հեռուստանախագծերից հրավերներ եմ ստանում, սակայն ժամանակի սղություն ունեմ, բացի այդ` չեմ կարող երկրից դուրս գալ:
Պատճառն այն է, որ պարային ոլորտին առնչվող նոր, մեծ ու ծավալուն նախագիծ եմ իրականացնում, դրա մասին, սակայն, դեռեւս ոչինչ պատմել չեմ կարող, քանի որ գաղտնիք է: Թող դա լինի գեղեցիկ անակնկալ իմ ազգին:
-«Սոֆի Դեւոյան» մշակույթի կենտրոնն ի՞նչ ծրագրեր ունի: Ձեր մենապարը ակնդրելու առիթներ կլինե՞ն:
-Հիմա մշակույթի կենտրոնով պատրաստվում ենք երեխաների գալա-համերգին եւ այլ մենահամերգների: Իսկ ես պարային համարով կներկայանամ մարտին Փարիզում տեղի ունենալիք «Armenian Europe Music Awards»-ին:
-Դուք արդեն հասցրել եք պարի դպրոցներ բացել Աբովյանում, Էջմիածնում, ինչպես նաեւ` Երեւանի մի շարք վարչական շրջաններում: Սա, բնականաբար, կապված է մեծ ծախսերի հետ: Ինչպե՞ս եք դրանք հոգում, հովանավորներ ունե՞ք:
-Տարբեր տեղերում դպրոցներ եմ բացում, որովհետեւ զգում եմ, որ երեխաների համար դժվար է, օրինակ, ծայրամասից կենտրոն գալը. ուզում եմ ամեն վարչական շրջան իր դպրոցն ունենա: Հովանավորներ չունեմ, երեւի միակ մարդն եմ Հայաստանում, որ սեփական թատրոն ունի: Շատ դժվար է 25 տարի շարունակ աշխատակիցներին քո գրպանից վճարելը: Ես ինքս ինձ վրա զարմանում եմ, թե ոնց եմ կարողացել դա անել: Բանկից վարկ ենք վերցնում, հետո 5-7 տարվա ընթացքում մարում ենք: Պետք է անվախ լինես, որ ինչ-որ բանի հասնես:
Առավել մանրամասն` սկզբնաղբյուր կայքում
