«36․000 դրամ թոշակ եմ ստանում, 30․000-ի դեղ եմ առնում»,- Marz News-ի թղթակցի հետ զրույցում նշում է  Արմավիրի մարզի Նոյեմբերյան բնակավայրի թոշակառուներից մեկը, որին լրագրողը հանդիպել է  գյուղի կենտրոնական հատվածում գտնվող զրուցարանում։ Ամեն օր հենց այս զրուցարանում են հավաքվում գյուղի տարեցներն ու թոշակառուները, թղթախաղ, նարդի խաղում, մի քիչ քաղաքական ու ոչ քաղաքական հարցեր քննարկում, հետո, ինչպես նրանցից մեկն է ասում՝ «գնում են տուն, կուշտ ուտում, քնում», եթե, իհարկե, «պահող ունեն»։ «Պահող» չունեցողների դեպքում ամեն բան շատ ավելի բարդ է։ Զրուցարանում հավաքված թոշակառուներից մեկի խոսքով՝ գյուղում նաև սոցիալապես անապահով ապրող ընտանիքներ կան, որ օրվա հացի համար «լաց են լինում»։