ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը հայտարարել է, որ հնարավոր է ներդվի միասնական տոմսերի համակարգ: Սա ենթադրում է էլեկտրոնային քարտի ներդրում, որով ուղևորը կկարողանա երթևեկել ցանկացած վայր՝ վճարելով հենց քարտի միջոցով:
«Քարտի վրա կլինի որոշակի գումար, որով կարելի է նստել ցանկացած ուղղությամբ գնացող երթուղային տաքսի կամ այլ տրանսպորտային միջոց»,- ասել է նախարարը:
Ըստ Մարտիրոսյանի, այս գործընթացը կարող է հանգեցնել նաև սակագների իջեցման։
Երևանում մետրոյի, ավտոբուսների և երթուղային տաքսիների գինը 100 դրամ է, իսկ տրոլեյբուսն արժե 50 դրամ: Ներկայումս, վճարման համակարգը կատարվում է գումարը վարորդին անմիջապես փոխանցելու միջոցով:
Նախարարը նաև ասել է, որ նախատեսված են տրանսպորտային համակարգի ևս մի քանի փոփոխություն: Մասնավորապես, մարզային երթուղիները, որոնք պատկանում են տարբեր սեփականատերերի, կսպասարկի մեկ ընդհանուր օպերատոր:
