«Սեզոնային փոփոխությունների ժամանակ, հատկապես գարնան սկզբին սրվում են սիրտ-անոթային հիվանդությունները, որոնք ՀՀ-ում հիմնական մահացության պատճառներից են: Այս հիվանդությունների կանխարգելումն ու բուժումն ունի ոչ միայն առողջապահական լուրջ նշանակություն, այլև սոցիալական բնույթ է կրում: Վերջին տարիներին լուրջ միջոցառումներ են ձեռնարկվել՝ բուժումն ավելի հասանելի դարձնելու համար: Հայաստանում 2015 թվականի հունվարի 1-ից գործում է պետական ծրագիր, որի էությունը սրտամկանի սուր ինֆարկտի ժամանակ շտապ ստենտավորումն է՝ պետական պատվերով»,-լրագրողների հետ հանդիպման ժամանակ ասաց ՀՀ ԱՆ գլխավոր սրտաբան Համլետ Հայրապետյանը՝ հավելելով.
«Պետության հնարավորությունները թույլ են տալիս կատարել մեկ նեղացած անոթի ստենտավորում, որը հանգեցրել է ինֆարկտի: Եթե անհրաժեշտ է լինում, ապա 2-րդ ստենտն էլ է դրվում ևս անվճար, սակայն խոսքը միայն ինֆարկտված անոթի մասին է: Իսկ, եթե հիվանդն ունի ևս այլ անոթների կամ տվյալ անոթի այլ հատվածի նեղացում, դրանք հետագայում կատարվում են պլանային ձևով՝ օրեր, շաբաթներ անց և վճարովի հիմունքներով»:
Հարցին, թե ինչո՞ւ է տեղադրվում ոչ դեղապատ ստենտ և ոչ թե դեղապատ, ՀՀ ԱՆ գլխավոր սրտաբանը պատասխանեց.
«Պետությունը այս ծրագրի համար տարեկան տրամադրում է 3 միլիոն դրամ, իսկ մենք պետք է ընդգրկենք բոլոր հիվանդներին: Մենք մարդուն չենք կարող ասել՝ գումարը հոկտեմբերին վերջացել է, իսկ ձեր ինֆարկտը տեղի է ունեցել դեկտեմբերին: Պետք է ապահովենք բոլորին, ինչի համար էլ ոչ դեղապատ ստենտ է տեղադրվում: Պետք է հասկանալ, որ ինֆարկտի ժամանակ կարևորը անոթը բացելն է, արյան հոսքը վերականգնելը»:
Համլետ Հայրապետյանի խոսքով՝ դեղապատի ու ոչ դեղապատի տարբերությունն այն է, որ առաջինի դեպքում կրկնակի փակվելու հավանականությունն ավելի քիչ է: Դեղապատինը կազմում է 10, ոչ դեղապատինը՝ 25 տոկոս: Իսկ, եթե հիվանդը դեղապատ ստենտ է ցանկանում, ապա վճարում է ամբողջ գումարը:
ՀՀ ԱՆ գլխավոր սրտաբանը հորդորեց նաև վարել առողջ ապրելակերպ, բուժել հիպերտոնիան, շաքարային դիաբետը, ավելորդ քաշը, ճիշտ սնվել, չծխել:
Անի Կարապետյան
