«Պատրաստվում էինք մայիս ամսին ներկայացնել Հայկ Պետրոսյանի հերթական ներկայացումը, սակայն մտափոխվեցինք և հասկացանք, որ այս ամիս այլ բան կարող ենք իրականացնել»,-Asekose.am-ին ասաց պրոդյուսեր Ալեքսանդր Մհերյանը` հավելելով, որ մայիսին 9-ին նախաձեռնել են «Շնորհակալ ենք, հա՛յ զինվոր, մենք քեզ հետ ենք» խորագրով բարեգործական համերգը:
Համերգին մասնակցելու են Սոնա Ռուբենյանը, Սևակ Ամրոյանը, Նարինե Դովլաթյանը, The Beautified Project-ը և Հայկ Պետրոսյանը: Վերջինս նաև հանդես է գալու որպես երեկոյի հանդիսավար: Բարեգործական համերգի ողջ հասույթը տրամադրվելու է ժամկետային զինծառայող 19-ամյա Ռուբեն Առաքելյանին.
«Ռուբենը ներկայումս հիվանդանոցում է գտնվում: Նա վիրավորվել է Թալիշի մոտակայքում քառօրյա պատերազմի ընթացքում: Ռուբենը ողնաշարի հետ կապված խնդիրներ ունի: Համերգից ստացված ողջ հասույթը կփոխանցենք նրա ընտանիքի անդամներին` անմիջապես համերգի ընթացքում: Առհասարակ, որոշում ենք կայացրել ամեն ամիս նմանատիպ բարեգործական համերգներ կազմակերպել և օգնել 1-2 զինծառայողների: Ընտրելու ենք նրանց, ովքեր սոցիալական աջակցության կարիք ունեն»,-նշեց Ալեքսանդր Մհերյանը:
Համերգի ընթացքում հնչելու են հիմնականում հայրենասիրական բնույթի երգեր` բոլորը նոր մոտեցմամբ.
«Համերգը լինելու է կենդանի հնչողությամբ: Լինելու են անակնկալ զուգերգեր, առհասարակ, բոլոր երգերը հնչելու են նոր մոտեցմամբ: Մենք ընտրել ենք այնպիսի երգիչների, ովքեր ասելիք ունեն, իրենցից արժեք են ներկայացնում: Ի վերջո, այս երգիչներին չի կարելի հանդիպել ռեստորաններում և ակումբներում. նրանք էժանագին երգեր և 6.8 չեն ներկայացնում»,-ասաց պրոդյուսերը` նշելով, որ համերգի տոմսերն արդեն գրեթե սպառվել են, սակայն մարդիկ դեռևս ունեն հնարավորություն մասնակցելու երաժշտական երեկոյին` այդ ձևով միաժամանակ բարեգործություն կատարելով:
Հավելենք, որ «Շնորհակալ ենք, հա՛յ զինվոր, մենք քեզ հետ ենք» խորագրով համերգը տեղի է ունենալու մայիսի 9-ին Հ. Թումանյանի անվան տիկնիկային թատրոնում, տոմսերի արժեքը 3000 դրամ է:
Հեղինակ` Լիլիթ Հակոբան
