Համար մեկ մեղավորն ու հանցավորը Ժաննա Անդրեասյանն է. Հայկ Դեմոյանը` Ծիծեռնակաբերդի շինարարական աշխատանքների մասին
Որևէ մեկը դեմ չէ, որ այստեղ իրականացվեն վերականգնողական աշխատանքներ, բայց աշխատաոճը վկայում է հանցավոր անփութության և անպատասխանատու գործելաոճի մասին, Ծիծեռնակաբերդի մոտ իրականացվող բողոքի ակցիայի ժամանակ ասաց Հայոց ցեղասպանության թանգարան–ինստիտուտի նախկին տնօրենը։ Նրա խոսքով` այս աշխատանքների արդյունքում հուշարձանին վնաս է պատճառվել, որոշ դեպքերում` անվերականգնելի։
«Ես նկատեցի, որ բանվորական անձնակազմը հայ չէ։ Ես մեղադրանք չեմ ներկայացնում աշխատանքային միգրանտներին, բայց այս մարդիկ չեն հասկանում` այս շինությունն ինչ նշանակություն ունի այս երկրի քաղաքացիների համար։ Նրանք հազիվ են խոսում անգլերեն, կարող են և չհասկանալ հրահանգը` ինչ պետք է արվի»,–ասաց Դեմոյանը։
Նա պահանջեց դադարեցնել «քանդման և ավերման աշխատանքները» և խզել շինընկերության հետ պայմանագիրը։
