1in.am-ը գրում է. Շիրակի մարզի ընդհանուր իրավասության դատարանում Արտակ Թադևոսյանի նախագահությամբ ավարտվել է Լեռնիկ Պ.-ի գործի քննությունը:
38-ամյա Լեռնիկը 2016 թվականի նոյեմբերի 6-ին, գիշերվա ժամը 3-ի սահմաններում գտնվելով հորեղբոր տանը՝ Շիրակի մարզի Կամո գյուղում, վիճել է այնտեղ գտնվող ծնողների հետ:
Վիճաբանության ընթացքում Լեռնիկը լրագրասեղանիկը բարձրացրել ու դրանով մի քանի անգամ անգամ հարվածել է հոր գլխին ու մարմնի տարբեր մասերին: Հայրը վարտիքով դուրս է փախել՝ օգնություն կանչելու:
Լեռնիկը սեղանի վրայից վերցրել է մետաղե սրճեփը, մի քանի անգամ հարվածել է մոր՝ Զոյայի գլխին, պատճառել է գանգուղեղային փակ բութ տրավմա, գլխուղեղի աջ կիսագնդում՝ արյունահավաք, նրբենու արյունազեղում, ուղեղանյութի և փորոքների արյունազեղումներ:
Ստացած վնասվածքներից Զոյա Պ.-ն հիվանդանոցում, գիտակցության չգալով, նոյեմբերի 18-ին մահացել է:
Նախաքննության ընթացքում Լեռնիկ Պ.-ի նկատմամբ նշանակվել ու կատարվել է դատահոգեբուժական ստացիոնար փորձաքննություն:
Լեռնիկ Պ.-ի հորեղբայրը դատարանում հայտնել է, որ Լեռնիկն իր եղբոր՝ Անդրանիկի որդին է, ամուսնացած է, ունի մեկ դուստր, կնոջ հետ բնակվում էր Երևանում:
Լեռնիկը հաշվառված է Գյումրիի հոգեբուժարանում, ստանում է հիվանդության թոշակ: Եղել են դեպքեր, երբ Լեռնիկը հանկարծ ագրեսիվացել է, անհիմն վիճել է ծնողների հետ, ծեծել է նրանց:
Լեռնիկի հայրն ու մայրը հիմնականում ապրել են Ռուսաստանի Տուապսե քաղաքում՝ մյուս որդիների մոտ: Նրանք Հայաստան էին եկել 2016 թվականի հոկտեմբերի 30-ին, և քանի որ եղանակային պայմանները վատն էին, նրանք ապրել են իր տանը:
2016 թվականի նոյեմբերի 5-ին, ժամը 18-ի սահմաններում Լեռնիկը Երևանից եկել է իրենց տուն: Նա ագրեսիվ վիճակում էր: Գիշերն ինքն արթնացել է իր կնոջ ձայնից: Տեսել է, որ եղբոր կինը՝ Զոյան, ընկած է գետնին, իսկ Լեռնիկը սրճեփով խփում է մոր գլխին:
Ինքն ու կինը միջամտել են, Լեռնիկը թողել-դուրս է եկել:
Որոշ ժամանակ անց ներս է եկել եղբայրը՝ Անդրանիկը, որ սպիտակեղենով դուրս էր վազել օգնություն կանչելու: Անդրանիկն իրենց պատմել է, որ Լեռնիկը լրագրասեղանով այնպես է հարվածել նրան, որ սեղանը կոտրվել է:
Զոյան գանգատվել է գլխացավից, հետո կորցրել է գիտակցությունը: Իրենք շտապօգնություն են կանչել, նրան տեղափոխել են հիվանդանոց, որտեղ նա առանց գիտակցության գալու մահացել է:
Լեռնիկի կինը հայտնել է, որ իրենք ընտանիքով գտնվել են Ռուսաստանի Տուապսե քաղաքում՝ Լեռնիկի եղբայրների մոտ: Այնտեղ են եղել նաև Լեռնիկի ծնողները:
Առավել մանրամասն` սկզբնաղբյուր կայքում
