«Ես ոչ միայն եկել եմ փոփոխություններ բերելու, այլև պիտի ապահովեի նախարարության բնականոն ընթացքը: Մենք գտնում ենք, որ ծրագրերը, որոնք հաստատվել են բյուջեով, անցել են մրցույթներով, կարող են ունենալ կոռուպցիոն ռիսկեր: Իսկ մենք պարտավոր ենք լինել բաց ու թափանցիկ, հաշվետու մեր քաղաքացիների առաջ: Իսկ իրողությունը մեզ մտահոգվելու, կասկածելու առիթներ տվեց: Երկու օր առաջ, երբ մեր կասկածները բավականին հիմնավոր էին, ես հանդիպեցի պետական վերահսկողական ծառայության պետ Դավիթ Սանասարյանի հետ, նրան ներկայացրի մեր մտահոգությունները»,-այսօր լրագրողների հետ զրույցում ասաց Սփյուռքի նախարար Մխիթար Հայրապետյանը:
Նախարարի խոսքով` բացահայտել է, որ շռայլություններ են եղել նախարարության տարբեր ծրագրերում:
«Օրինակ՝ «Արի տուն» ծրագրի մասնակիցներից յուրաքանչյուրի լանչի համար չորս հազար դրամ է տրամադրվել. գառ պիտի մատուցեի՞ն ամեն մի երեխային, սև խավիա՞ր, թե՞ ինչ»:
Ըստ այդմ` նախարարն ասաց, որ եկել են ծրագրերը ժամանակավորապես հետաձգելու որոշմանը, քանի որ կասկածներ ունի, որ փողեր են մսխվել:
Մխիթար Հայրապետյանն ասաց, որ ըմբռնումով են մոտենում այն ծնողների մոտեցումներին, ովքեր կդժգոհեն, որ արդեն իսկ ավիատոմսեր են գնել իրենց երեխաների համար:
«Կհասկանամ այն մի քանի հարյուր մարդկանց, ովքեր գնել էին ավիատոմսերը, սակայն մեզ համար սկզբունք է, որ պետք է բացառվեն կոռուպցիոն ռիսկերը: Բացի այդ, ծրագրերը, որ ժամականակավորապես հետաձգվում են, բարելավվելու են»:
