Արդեն հայտնել էինք, որ «Հաց բերողին» սատարողները, որոնց թվում զգալի քանակ էին կազմում երիտասարդները, հավաք էին կազմակերպել Ազատության հրապարակում, որից հետո սկսել են երթը:
Կառավարության շենքի առաջ նրանք վարչապետի խորհրդականին են փոխանցել իրենց պահանջագիրը՝ երեկ «Արմենիա» բժշկական կենտրոնում մահացած «հաց բերող» Արթուր Սարգսյանին հուղարկավորել Եռաբլուրի պանթեոնում:
Նշենք, որ, ըստ ասեկոսեների, Արթուր Սարգսյանին Եռաբլուր պանթեոնում հուղարկավորելու համար նրա հարազատները դիմել են իշխանություններին, սակայն պատասխանը նրանց չի գոհացրել:Այս մասին Կառավարության շենքի մոտ ակցիայի ժամանակ հայտարարեց նաև Շահեն Հարությունյանը՝ ասելով. «Պատասխանը եղել է՝ ոչ»,:
Կարեն Կարապետյանի խորհրդականը խոստացել է այդ հարցով պատասխանը հայտնել վաղը՝ հերքելով տեղեկությունը, թե իրենք արդեն իսկ մերժել են Արթուր Սարգսյանին Եռաբլուրում հուղարկավորելու պահանջը. «Նման դիմում մեզ չի եղել»։
