Այսօր՝ հունիսի 1-ին, Ստեփանակերտի կենտրոնում՝ Ստեփան Շահումյանի անվան օղակաձև պուրակում, քաղաքապետարանի նախաձեռնությամբ տեղի է ունեցել տոնական միջոցառում՝ նվիրված երեխաների պաշտպանության միջազգային օրվան։
«Արցախպրես»-ի թղթակցի հաղորդմամբ՝ ծրագրի շրջանակներում կազմակերպել է համերգային ծրագիր, որին մասնակցել են մայրաքաղաքի արվեստի դպրոցների և մանկապարտեզների սաները: Համերգի ընթացքում երեխաներին շնորհավորել ու զվարճացրել են ծաղրածուներ և մուլտհերոսներ։ Իսկ միջոցառման վերջում համերգի մասնակից փոքրիկները ստացել են նվերներ:
«Նման համերգային ծրագրով ցանկանում ենք շնորհավորել բոլոր փոքրիկ արցախցիներին և մաղթել նրանց ուրախություն, խինդ ու ծիծաղ: Թող որ նրանք խաղաղ երկնքի տակ մեծանան ու աշխարհի մյուս երեխաների նման երջանիկ մանկություն ունենան»,- մեր թղթակցի հետ զրույցում ասել է Ստեփանակերտի քաղաքապետարանի մշակույթի, երիտասարդության հարցերի և զբոսաշրջության բաժնի պետ Կարինե Հարությունյանը և հավելել, որ օրվա խորհրդի հետ կապված՝ մայրաքաղաքի նախապատրաստական կրթօջախներում տարբեր միջոցառումներ են նախատեսված:
