Այս պահին Երևանի Ավան և Նոր Նորք ընդհանուր իրավասության դատարանում ընթանում է «Երևան» հիմնադրամի նախագահ Աշոտ Ղազարյանի խափանման միջոց կալանքի միջնորդության դատական նիստը։
Լրագրողներին չեն թողնում ներս մտնել: Դատարանի հսկիչների խոսքով` նիստը փակ է և ոչ աշխատանքային օր է, ուստի չեն կարող ներս թողնել ԶԼՄ-ների ներկայացուցիչներին։
Այնուհետև մոտեցավ դատավորի օգնականն,ով ասաց,որ դատախազը միջնորդել է կալանքն ընտրել որպես խափանման միջոց՝ նշելով, որ չի կարող ներս թողնել լրագրողներին, քանի որ նիստը դռնփակ է։ Դատարանի մոտ հավաքված Աշոտ Ղազարյանի բարեկամներն ասացին, որ Աշոտ Ղազարյանը հացադուլ և ջրադուլ է հայտարարել՝ իրեն անհիմն ձերբակալելու համար։
Նրանք նաև նշեցին, որ այն, ինչ Աշոտ Ղազարյանի և «Երևան» հիմնադրամի նկատմամբ արվում է, ապօրինություն է։ Հարազատների խոսքերով` այդ «մասկի շոու»-ի կարիքը չէր լինի, եթե իրականում հանցանք տեղի ունեցած լիներ։
Հիշեցնենք, որ հունիսի 13-ին Ազգային անվտանգության ծառայությունը Երևանի քաղաքապետարանի վարչական շենքում տեղակայված «Երևան» հիմնադրամի աշխատասենյակներում կատարել էր խուզարկություններ, հարուցված է քրեական գործ, որի շրջանակներում երկու անձ՝ Դավիթաշեն վարչական շրջանի ղեկավարի տեղակալն ու «Երևան» հիմնադրամի տնօրենը ձերբակալվել է:
