«Հրապարակ» օրաթերթի գլխավոր խմբագիր Արմինե Օհանյանի ֆեյսբուքյան գրառումը․
«Ես, իհարկե, այնքան ազատ ժամանակ չունեմ, ինչքան վարչապետի աշխատակազմի ղեկավար Արայիկ Հարությունյանը, որ օրական մի քանի ստատուս երկնեմ` ամենաանկարևոր և միայն ինձ «հաճույք» պատճառող թեմաներով, բայց քանի որ սույն անձը որոշել է «Հրապարակի» դեմ տարած իր խղճուկ դատական հաղթանակին ստատուս նվիրել, այդ թեմայով հետաքրքրված անձանց որոշ մանրամասներ կներկայացնեմ, որպեսզի պատկերացնեն, թե այս իշխանության ներկայացուցիչներն ինչպիսի «հաղթանակներ» են տանում և ինչ են արել դատական իշխանության հետ, որ նրանց նման հաղթանակներ է «պարգևում»:
Ուրեմն 2022թ. հուլիսի 21-ին մենք մի հրապարակում ենք արել` «Հրաչը՝ ներսում, Ավինյանը՝ դրսում. բախումներ չեն լինի» վերնագրով, որն ամբողջությամբ վերաբերում է այդ ժամանակվա քաղաքապետ Հրաչա Սարգսյանին և քաղաքապետ դառնալու ճանապարհին գտնվող Տիգրան Ավինյանին: Այսօրվա աչքով կարդալիս, կարելի է ասել, ուղղակի մարգարեական հրապարակում է, որը մեկին մեկ իրականություն է դարձել տպագրությունից հետո մեկ տարվա ընթացքում. հրապարակումից 2 ամիս անց Ավինյանը նշանակվել է փոխքաղաքապետ, նա վարկանիշ չուներ 2022-ին եւ 2023-ի ընտրություններին էլ բավարար ձայներ չստացավ եւ այլն:
Հրապարակման վերջում մի տող կար, թե 22-ի ամռանն ովքեր դերակատարում ունեն քաղաքապետարանում և թվարկվածների շարքում հիշատակվել էր նաև Ա.Հարությունյանը. «Քաղաքի կառավարման հարցերում ակտիվ դերակատարում ունեն նաև ՀՀ վարչապետի աշխատակազմի ղեկավար Արայիկ Հարությունյանը և նրա եղբայրը՝ Արամ Հարությունյանը, ով մասնավոր ընկերություն ունի և իրենով է անում փողոտ ծրագրերը»:
Ահա հենց այս նախադասության համար է Արայիկ Հարությունյանը դիմել դատարան` ընդդեմ «Հրապարակի» և իրենց կողմից ստրկացված դատարանը` 2019-ին դատավոր նշանակված Սյուզաննա Ուլիխանյանի, ապա Վերաքննիչի դատավորներ Դավիթ Սերոբյանի, Նաիրա Մարգարյանի ու Գայանե Խաչատրյանի կազմով գտել են, որ այս տողում «զրպարտություն» կա և հօգուտ Արայիկ Հարությունյանի որոշում են կայացրել. հերքում և 225 հազար դրամի փոխհատուցում, ինչից էլ այդքան հրճվել է սույն անձնավորությունը, որն ամեն ինչով զբաղված է` բացի իր պարտականությունների:
Ի դեպ, անգամ մեձիշխանական համարվող «Տեղեկատվական վեճերի խորհուրդն» այս վճիռը համարել է ոչ իրավաչափ և եզրակացություն է հրապարակել, որ դատարանի որոշ փաստարկներ «ակնհայտ անհիմն են», «վճիռն անհամաչափ սահմանափակում է լրատվամիջոցի՝ տեղեկություններ ու գաղափարներ տարածելու իրավունքը»։
Մենք, իհարկե, Վճռաբեկ դատարան ենք դիմելու, եթե չհաջողվի այս տարրական բաները բացատրել ՀՀ դատավորներին` նաև Եվրոդատարան: Բայց դա չէ խնդիրը և չենք կարծում, թե սուղ միջոցներով գոյատևող «Հրապարակը» մի քանի հարյուր հազար դրամ վճարելով աղքատանալու է, իսկ 18-ից հետո ահռելի հարստություն կուտակած հայցվորը` հարստանալու:
Ուղղակի այս թյուրիմացությունները 7 տարում ոչ միայն մեր երկրին տարածքային ու մարդկային մեծ կորուստներ պատճառեցին, այլ ամբողջական համակարգեր քայքայեցին ու հպատակեցրին իրենց: Ես` անձամբ, որպես երկրորդ մասնագիտությամբ իրավաբան, շատ ծանր եմ տանում դատական համակարգի ստրկացումը: Համակարգ, որից հեռացրին քիչ թե շատ գրագետ, ինքնուրույն, դիմադրելու ունակ դատավորներին և տեղը լցրեցին սրբություն չունեցող, անհայրենիք ու տգետ ջահելներով, որոնք խելոք կատարում են սրանց բոլոր ապօրինի հրահանգները»:
