Հայաստանի տարբեր թանգարաններից ընտրված մասնագետների խումբը հնարավորություն կստանա հուլիսի 4-10-ը վերապատրաստման դասընթաց անցնել Գերմանիայի թանգարաններում:
Ուսումնական այցի նպատակն է՝ թանգարանային կրթության ոլորտում ներգրավված մասնագետներին ներկայացնել գերմանական թանգարաններում ընտանեկան այցելության խրախուսման, երիտասարդներին թանգարան ներգրավվելու, մեծահասակների և տարեց այցելուների հետ աշխատանքի, նորագույն տեխնոլոգիաների կիրառման նախագծեր:
Պարզվում է՝ նման ծրագրեր արդեն իրականացվում են ՀՀ թանգարաններում:
«Գաղտնիք չէ, որ այսօր քչերն են ընտանիքի հետ միասին թանգարան այցելում, ուստի նախաձեռնեցինք ինտերակտիվ-ճանաչողական «Լաբիրինթոս» ծրագիրը, որը հիմնված է ծնողի ու երեխայի ակտիվ փոխշփման հիման վրա: Այն ներառում է մի քանի՝ տեսական և գործնական, ինչպես նաև ինտերակտիվ խաղերի փուլեր: Սկզբնական շրջանում ծնողներին ու երեխաներին ծանոթացնում են արվեստի ուղղությունների հետ: Նախատեսված է 7-12 տարեկան երեխաների համար»,-լրագրողների հետ հանդիպման ժամանակ ասաց Վանաձորի կերպարվեստի թանգարանի փոխտնօրեն Հայկուհի Ավագյանը:
