Օգոստոսի 25-ին թունավորման դեպք է տեղի ունեցել Սյունիքի մարզում:

Ինչպես հայտնում է ֆոտոլրագրող Գագիկ Շամշյանը, Ժամը 22:50-ի սահմաններում ՀՀ ներքին գործերի նախարարության ոստիկանության համայնքային ոստիկանության գլխավոր վարչության Գորիսի բաժնում օպերատիվ տեղեկություններ են ստացվել, որ «Գորիս» բժշկական կենտրոն են տեղափոխվել մի քանի քաղաքացի՝ «թունավորում» ախտորոշմամբ:

Հիվանդանոց են մեկնել ՀՀ ՆԳՆ ոստիկանության քրեական ոստիկանության գլխավոր վարչության Սյունիքի մարզի քրեական վարչության պետ Անտոն Անտոնյանն ու ոստիկանության Գորիսի բաժնի պետ Կարեն Հովսեփյանը:

Տեղում պարզվել է, որ ստացված օպերատիվ տեղեկությունը հավաստի է:

***

Թարմացված․Գորիսի «Փոսիկի աղբյուր» կոչվող բացօթյա տաղավարում կազմակերպված խնջույքի ժամանակ վատացել է 17 քաղաքացու ինքնազգացողությունը. նրանք աղեստամոքսային տրակտի խանգարումներով և նախնական «սուր էկզոգեն սննդային թունավորում» ախտորոշմամբ ընդունվել են Գորիսի ԲԿ. ՍԱՏՄ

ՍԱՏՄ տեսուչները նմուշառում են կատարել տեղում օգտագործված սննդամթերքից (ձմերուկ, երշիկ, բաստուրմա, հավի մսով-մայոնեզով աղցան, խորոված բանջարեղեն՝ սմբուկ, պոմիդոր, խոզի խորոված, տավարի խաշլամա) և տվել մանրէաբանական լաբորատոր հետազոտության:
Արդյունքները կհրապարակվեն ավելի ուշ։