«Ունենք լուրջ խուճապային վիճակ և հանրային անվստահություն, որի բոլոր հիմքերը կան: Մարդիկ իմացան, որ շուկայում առկա է 30 տոննա և ավելի վտանգավոր ճանաչված մթերք (հավի միս): Որևէ մեկին դրա ոչնչացման գործընթացին մասնակից չդարձրին: Չգիտենք՝ այն ոչնչացված է, թե՝ ոչ: Ավելին՝ ստուգեցին կիսատ-պռատ ու որևէ խոսք չեղավ հակաբիոտիկների մասին:
Մի քանի օր առաջ ՀՀ ոստիկանությունը պարզեց, որ մսի շուկայում իրացվում է ավանակի և ձիու միս: ՍԱՊԾ-ն՝ լիազոր մարմինը, որը պետք է հայտնաբերեր, էլի ինքը չարեց, բայց գնաց ոստիկանության հետեքերով ու այն որակեց որպես իրենց աշխատանք: Այս ամենը հանգեցրել է նրան, որ հասարակության զգալի մասը վախենալով է ամեն ինչ անում: Անգամ զանգեր ենք ստանում մսից թթու համ առնելու մասին: Հնարավոր է՝ լինի ձիու միս կամ լարվածության արդյունք»,-լրագրողների հետ հանդիպման ժամանակ ասաց «Իրազեկ և պաշտպանված սպառող» հասարակական կազմակերպության հիմնադիր և նախագահ Բաբկեն Պիպոյանը:
Նրա խոսքով՝ հնարավոր չէ առանց լաբորատոր փորձաքննության տարբերակել միսը:
Ինչ վերաբերում է Ամանորին սպասվող գնաճի հավանականությանը՝ Բաբկեն Պիպոյանը նշեց, որ մսամթերքի շուկայում անցած տարվա համեմատ 20 տոկոս աճ կա, նույնն է նաև ալկոհոլային խմիչքների դեպքում: Գները բարձրացել են 12-13 տոկոսով:
Չնայած այս վատ լուրերին՝ «Իրազեկ և պաշտպանված սպառող» հասարակական կազմակերպության հիմնադիրը լավ լուր էլ ունի.
«Կան միջազգային ընկերություններ, որոնք իրենց գնային քաղաքականությունը վարում են այնպես, որ Ամանորին զեղչեր լինեն: Եվ, քանի որ նրանք Հայաստանում ունեն պաշտոնական ներկայացուցչություն, հետևաբար, կանոնը վերաբերում է բոլորին: Նմանատիպ զեղչեր լինում են գազավորված ըմպելիքի, բնական հյութի, ալկոհոլային խմիչքի, պահածոյի շուկայում: Որպեսզի չկորցնեն մրցակցային դիրքը՝ մեր տնտեսվարողները նույնպես զեղչեր են անում»,-մանրամասնեց Բաբկեն Պիպոյանը:
Անի Կարապետյան
