Ս. թ. հունիսի 3-ին տեղի ունենցավ Երևանի Ալ. Շիրվանզադեի անվան թիվ 21 հիմնական դպրոցի աշակերտական հասարակական կազմակերպության /ԱՀԿ/ կողմից մասնակիորեն վերանորոգված դպրոցական մարզադահլիճի բացման արարողությունը: Արարողության ներկա էր ՀՀ ԿԳ նախարար Լևոն Մկրտչյանը: Վերոհիշյալ աշակերտական հասարակական կազմակերպությունը ստեղծվել է «Հայաստանի պատանեկան նվաճումներ» կազմակերպության «Ձեռնարկատիրական և քաղաքացիական կրթություն» ծրագրի շրջանակներում: Ծրագիրն իրականացվում է ՀՀ ԿԳ նախարարության հետ ս. թ. ապրլի 18-ին կնքված հուշագրի շրջանակներում: Ըստ այդ հուշագրի`նախատեսվում է հանրակրթական ուսումնական հաստատություններում ներդնել ձեռնարկատիրական կրթության բաղադրիչը տարրական և հիմնական դպրոցում` որպես ինտեգրվող բաղադրիչ «Տեխնոլոգիա» առարկայի մեջ, իսկ ավագ դպրոցում՝ որպես հատուկ դասընթաց իր տեսական և գործնական բաժիններով:
Հայաստանի պատանեկան նվաճումներ կազմակերպության կողմից իրականացվող ձեռնարկատիրական կրթության ծրագիրը ֆինանսավորվում է JHM բարեգործական հիմնադրամի և HSBC բանկի կողմից: Բացման արարողությանը ներկա էր նաև HSBC բանկի գլխավոր տնօրեն Փոլ Էդգարը:
Ծրագրի առաջին հատվածում` 2016 թ. սեպտեմբեր – դեկտեմբեր ամիսներին, աշակերտները հնարավորություն ունեցան ծանոթանալու տնտեսագիտության և ձեռներեցության հիմունքներին, հիմնելու գործարար ընկերություն (ԱԳԸ) «Երևանը մենք ենք» անվամբ և զբաղվելու բիզնես գործունեությամբ: Հենց սեպտեմբերին նրանք սկսեցին հետազոտել շուկան և ուսումնասիրել սպառողական պահանջարկը, որոնց արդյունքում պատանի ձեռներեցները կայացրին հետևյալ բիզնես որոշումը. «Քանի որ մոտենում էր Երևան քաղաքի ծննդյան օրը, մենք որոշեցինք արտադրել այնպիսի արտադրանք, որը նվիրված կլիներ այդ տոնակատարությանը: Մեր ընտրությունը կանգ առավ երևանյան թեմաներով լուսանկարների և հուշանվեր- մագնիսների արտադրության վրա: Մենք համնոզված էինք, որ սպառողները սիրով կգնեն մեր արտադրանքը », - նշում են պատանի ձեռներեցները:
«Երեխաներն իրենք են շրջել Երևանով ու արել լուսանկարներ, հետո պատրաստել են շրջանակներ ու մագնիսներ: Նույնիսկ փաթեթավորումն էր իրենց ձեռքի աշխատանքը: Նորարարություն էր իրենց իսկ ձեռքով լուսանկարներ անելն ու շրջանակների մեջ վերցնելը: Հաջողություն կարող ենք համարել, որ մեր ուսուցչական կոլեկտիվի մի քանի անդամներ նույնիսկ պատվերներ տվեցին՝ իրենց բնակարաններում մի քանի նկարներ ունենալու համար» - նշում է ուսուցչուհին` Հռիփսիմե Վարդանյանը:
Արտադրանքի վաճառքից գոյացած հասույթը կազմեց 33 000 ՀՀ դրամ, իսկ աշակերտների վաստակած շահույթը` 13 000 ՀՀ դրամ:
Գործարարության հիմունքներն ուսումնասիրելիս աշակերտները միաժամանակ ծանոթացան նաև կորպորատիվ սոցիալական պատասխանատվությանը (ԿՍՊ) և մշակեցին իրենց աշակերտական գործարար ընկերության ԿՍՊ ռազմավարությունը: Այդ կապակցությամբ էլ պատանի ձեռներեցները իրենց վաստակած ողջ գործարար շահույթը հատկացրին իրենց կորպորատիվ գործունեությանը և ապա գումարեցին այն միջոցներին, որոնցով նախատեսել էին իրականացնել մարզադահլիճի մասնակի վերանորոգման աշխատանքները:
Ծրագրի երկրորդ հատվածում` հունվար – մայիս ամիսներին, երբ աշակերտներն իրենց գործարար ընկերությունը վերափոխեցին հասարակական կազմակերպության, ձեռնամուխ եղան համայնքային վերոհիշյալ խնդրի լուծմանը: Իսկ թե ինչու բազմաթիվ համայնքային խնդիրներից պատանի հասարակական գործիչները հատկապես ընտրեցին և ցանկացան լուծել այդ խնդիրը, աշակերտական հասարակական կազմակերպության անդամները մեկնաբանեցին. «Որպես հիմնախնդիր` ընտրեցինք մեր դպրոցի մարզադահլիճի մասնակի վերանորոգումը: Հատկապես ընտրեցինք այդ հիմնախնդիրը, քանի որ մեր դպրոցի աշակերտները ֆիզկուլտուրայի դասերը պարապում են արտակարգ իրավիճակային պայմաններում՝ ամեն գնդակ նետելուց վախենալով, որ պատը կփլվի իրենց վրա: Այդ իսկ պատճառով էլ մեր ԱՀԿ-ն որոշեց այս ձևով օգնել դպրոցին և բարելավել պայմանները: Արդյունքում կունենանք մաքուր և վերանորոգված մարզադահլիճ, որտեղ դասերն ավելի հաճույքով կպարապենք, և, որ ամենակարևորն է, նախկինում եղած վտանգն էլ չի լինի» - բացատրում են ծրագրի սաները:
Այդ հիմնախնդրի լուծման նպատակով թիվ 21 դպրոցի պատանի հասարակական գործիչներին դեռևս մարտ ամսին «Հայաստանի պատանեկան նվաճումներ» կազմակերպությունը տրամադրել էր 150 000 ՀՀ դրամի չափով դրամաշնորհ: Հենց այդ գումարով էլ ԱՀԿ անդամները ձեռնարկեցին վերանորոգման աշխատանքները: Ծրագրի ընդհանուր արժեքը կազմել է 642 000 ՀՀ դրամ: Ծրագրի իրականացմանը օժանդակեցին նաև դպրոցի աշակերտական հիմնադրամը, ծնողները և ուսուցիչները:
«Հայաստանի պատանեկան նվաճումներ» կազմակերպության կողմից ներկայումս հանրապետության ավելի քան 150 դպրոցներում իրականացվող «Ձեռնարկատիրական և քաղաքացիական կրթություն» ծրագրի առաքելությունն է Հայաստանի Հանրապետության երիտասարդների շրջանում հավատ սերմանել սեփական ուժերի և վաղվա օրվա նկատմամբ:
Ծրագրի նպատակներն են երիտասարդներին ոչ միայն հաղորդել տնտեսագիտական հիմնարար գիտելիքներ, այլ նաև նրանց ծանոթացնել շուկայական տնտեսության սկզբունքներին, զինել ձեռնարկատիրական և ֆինանսական անհրաժեշտ հմտություններով և կարողություններով, սովորեցնել` ինչպես փող վաստակել: Ծրագիրը հատուկ ուշադրություն է դարձնում նաև մասնակիցների շրջանում նորարարական և ստեղծագործական մտածելակերպի զարգացմանը, ինչպես նաև կորպորատիվ սոցիալական պատասխանատվության հիմունքների դասավանդմանը: Ծրագրի շնորհիվ մասնակիցները լավագույնս կհասկանան, թե ինչ է նշանակում քաղաքացիական հասարակությունը, և ինչպես կարելի է դառնալ այդ հասարակության լիարժեք անդամ: Ծրագրի շրջանակներում ծանոթանալով հասարակական կազմակերպությունների /ՀԿ-ների/ գործունեությանը և դրանց հիմնադրման գործընթացին՝ մասնակիցները կխրախուսվեն՝ ընդգրկվելով դպրոցական և համայնքային խնդիրների լուծման գործընթացին, և նրանց մեջ կձևավորվի դրական վերաբերմունք կամավորական աշխատանքների նկատմամբ:
Մանրամասն տեղեկությունների համար կարող եք այցելել կազմակերպության վեբկայք` www.jaarmenia.org:
