Հայտնի հեռուստահաղորդավար և լրագրող, Հանրային հեռուստաընկերության հատուկ հեռուստանախագծերի բաժնի ավագ խմբագիր  և «Բարդ երկուշաբթի» հաղորդման հեղինակ ու վարող Տիգրան Դանիելյանի համար  հաճելի  հանգուցալուծում է ունեցել պատմությունը, որը սկզբնական շրջանում նրան բավականին տխրեցրել էր:

Ընկերների հետ կիրակնօրյա երեկոն անցկացնելուց հետո` Տիգրանը նստել է տաքսի և ուղևորվել տուն` ճանապարհին նաև կանգ առնելով Երևանի սուպերմարկետներից մեկում:

Տուն հասնելով,սակայն, Տիգրանը պարզել է,որ կորցրել է դրամապանակը, որում ոչ միայն մեծ գումար կար, այլ նաև`իր բանկային քարտերն ու նույնականացման  անձնագիրը:

Վստահ  չլինելով, թե հատկապես երբ և որտեղ է կորցրել դրամապանակը,Տիգրանը որոշում է առավոտյան արգելափակել  բանկային քարտերն ու սկսել նաև նույնականացման անձնագրի վերականգնման բարդ գործընթացը: 

Սակայն, հուրախություն նրա, Ֆեյսբուք սոցիալական ցանցի միջոցով Տիգրանին անմիջապես գտնում է տաքսու վարորդն ու տեղեկացնում,որ դրամապանակը գտել է տաքսու նստատեղի տակ, հիշել է իր հայտնի ուղևորին հեռուստաէկրանից, հարցուփորձ արել, գտել նրան համացանցում  ու սպասում է Տիգրանի  զանգին,որպեսզի նրան  փոխանցի  դրամապանակը:

Փաստորեն, «Բարդ երկուշաբթի» հաղորդման հեղինակ ու վարող Տիգրան Դանիելյանի համար վերջին կիրակին էր բարդ, իսկ երկուշաբթին  պարզ ու լուսավոր դարձավ ազնիվ վարորդի` Ջանիկ Սիմոնյանի շնորհիվ,ով իրաքահայ է և  վերջին տարիներին ընտանիքով  տեղափոխվել է Երևան:

Հեղինակ`

Անի Հարությունյան