tert.am-ը գրում է. Tert.am Youth-ի զրուցակիցը հայ շատ հայտնիներին նորաձևություն թելադրող մեկն է, ով տարիներ առաջ, ընտանիքը թողնելով Ղազախստանում, միայնակ հայտնվել էր Երևանում: Տնտեսագետի մասնագիտություն ստացած աղջկան, ինքն էլ չգիտի, թե ինչու, բայց մշտապես հետապնդել է այն միտքը, թե ամեն ինչ լավ կլինի Հայաստանում: Որքանո՞վ սպասելիքներն արդարացվեցին, ինչը՞ ստիպեց նրան լաց լինել Արցախում, կա՞ արդյոք սիրտ սրտի տակ և մյուս բոլոր հարցերի պատասխանները՝ Ֆաինա Հարությունյանի հետ զրույցում:
Օդանավը տարիներ առաջ տարավ Ձեզ Ղազախստան, իսկ հետո նորից հետ բերեց հայրենիք: Կարո՞տ, արյան կա՞նչ, բիզնեսի ու ստեղծագործական կյանքի համար պարարտ հո՞ղ, թե՞...
-Ե՛վ կարոտ, և՛ արյան կանչ: Ես հասկանում էի, որ եթե այդ պահին չգամ, ապա էլ երբեք չեմ վերադառնա: Գալիս է մի տարիք, երբ դու պետք է սկսես նոր կյանք, իսկ դա պետք է անել ճիշտ տեղում: Այսինքն՝ այնտեղ ուր դու քեզ քո ափսեում ես զգում: Ես ընտրեցի հայրենիքը ու մի ակնթարթ չեմ փոշմանել: Այստեղ ես երջանիկ եմ: Այստեղ սկսվեց կյանքիս իրական պատմությունը:
Գիտենք, որ ծնվել եք Արցախում: Ե՞րբ եք վերջին անգամ եղել այնտեղ:
-Անցյալ ամռանը: Մինչ դա չէի կարողանում գնալ: Վերջին անգամ պատերազմից առաջ էի եղել: Դժվար է գնալ, երբ չկա հայրական տունդ, բայց հավաքեցի ուժերս ու գնացի: Մտա Արցախ: Ամեն ինչ հարազատ էր և իմը: Ցավոք չկա պապիկիս տունը, որ մանկությանս երջանկության համը կարողանամ զգալ: Գուցե շատ հուզված եմ պատասխանում հարցին, բայց դա ինձ համար չափազանց ցավոտ թեմա է և առանց էմոցիայի չեմ կարողանում: Երազում եմ, որ գա այնպիսի օր, երբ կկարողանամ երեխայիս ցույց տալ մեր հողերը:
«Ֆաինան» դարձավ «Ֆաինա», երբ սկսեց համագործակցել հայտնի հեռուստադեմքերի հետ: Ինչպե՞ս ստացվեց:
- Պարզապես ստացվեց: Հավանաբար պետք է ստացվեր, քանի որ ես միշտ գնում եմ երազանքներիս հետևից: Այս անգամ էլ էի հավատում, որ իմ մոտ ստացվելու է: Առաջինը աշխատել եմ Գոհար Գասպարյանի հետ, իսկ հետո նաև մյուսների: Աստիճանաբար սկսեցին ինձ ճանաչել: Հետո հաղորդում էի վարում հեռուստատեսությամբ և ինձ սկսեցին ճանաչել նաև փողոցում: Աննկարագրելի հաճելի զգացում է, երբ քեզ փողոցում ճանաչում են: Կներեք, բայց չեմ հավատում մարդկանց, որ ասում են, թե հայտնի լինելը ձանձրալի է և չեն ուզում հայտնի դառնալ: Աննկարագրելի հաճելի է, երբ անծանոթը կարող է քեզ ասել, որ ինքը քեզ սիրում է:
Անդրեի հետ միասին ջինսերի արտադրությամբ էիք զբաղվում, ինչո՞ւ շարունակություն չեղավ:
-Ես պարզապես օգնում էի ընկերոջս: Հիմա երկուսս էլ այլ պլաններ ունենք: Բայց, եթե Անդրեն մի օր նմանատիպ առաջարկ անի, ապա մի վայրկյան չեմ մտածի ու կհամաձայնեմ: Անդրեն ինձ համար պարզապես երգիչ չէ, այլ հարազատ դարձած մեկը: Եղբոր պես սիրում եմ Անդրեին: Անդրեն միշտ կողքիս է, եթե նույնիկ շատ հեռու է:
Ովքե՞ր են ստեղծում նորաձևությունը՝ հայտնիները թե՞ դիզայներները:
-Հայտնիները հագուստը դարձնում են ճանաչելի: Ոճաբանը պարզապես օգնում է, որ հեռուստադեմքը առավել ոճային դառնա:
Եթե փորձենք ընդհանրացնել, ապա որքանո՞վ են հետևում նորաձևությանը հայ հայտնիները:
-Հայ հայտնիները շատ տարբեր են: Նրանք շատ իրարամերժ են ճաշակով: Նրանք յուրովի են հասկանում նորաձևությունը:
Նյութը`սկզբնաղբյուր կայքում
