«Մի շարք գործիքակազմեր, որոնք նախատեսված են միջազգային իրավական պաշտպանության տեսանկյունից, իրացվում են»,- անդրադառնալով Սամվել Կարապետյանի գործին՝ ասաց փաստաբան Արամ Վարդևանյանը։
Դիտարկմանը, թե ասում են՝ Պուտինը Սամվել Կարապետյանին ուղարկել է ՀՀ՝ իշխանափոխություն անելու և վարչապետ դառնալու նպատակով և կգա այն պահը, որ Պուտինը տեր կկանգնի Կարապետյանին, Վարդևանյանը պատասխանեց․ «Չգիտեմ՝ ինչպես արձագանքել, հարգանքով եմ վերաբերվում ժողովրդի մեջ տարածված խոսակցություններին, յուրաքանչյուրս ունի ազատ արտահայտվելու իրավունք։ Սակայն Սամվել Կարապետյանը հանդիսանում է ոչ միայն ՀՀ քաղաքացի, բայց մեր օրենսդրության համաձայն միայն ՀՀ քաղաքացին կարող է լինել կառավարության անդամ, ԱԺ պատգամավոր և այլն»։

«Գործարար Սամվել Կարապետյանը ենթարկվում է քաղաքական հետապնդման»,- ասուլիսի ժամանակ ասաց փաստաբան Արամ Վարդևանյանը՝ ներկայացնելով Կարապետյանի քրեական գործն ու նրա կալանավորման նախապատմությունը։ Փաստաբանն իր խոսքում հանգամանքներ նշեց՝ ապացուցելու քաղաքական հետապնդման փաստը․ «Խոսքը ենթադրյալ միջին ծանրության հանցանքի մասին է, որի համար պատիժը կարող է լինել տուգանքը։ Այս դեպքում ընդհանրապես խափանման միջոց չէր կարող լինել, երբ չի էլ եղել ենթադրյալ քրեորեն հետապնդելի արարքը։ Բայց ի՞նչն է ընդգծում գործի նկատմամբ ոչ լեգիտիմ նպատակն ու քաղաքական հետապնդման տարրը, որ նույնիսկ տնային կալանքը չի ընտրվել որպես խափանման միջոց։ Այնինչ Գլխավոր դատախազն ԱԺ-ում իր հաշվետվության ժամանակ ներկայացրել էր վճռաբեկ դատարանի վերջերս ընդունված մի նախադեպ, որտեղ ուղիղ գրված է, որ տնային կալանքին միշտ պետք է նախապատվություն տրվի, հատկապես միջին ծանրության ենթադրյալ հանցանքների դեպքերում»,- ասաց Վարդևանյանը՝ նշելով, որ Կարապետյանի դեմ հաղորդումը ՔԿ ներկայացվել է անձամբ գլխավոր դատախազ Աննա Վարդապետյանի կողմից։