Դեռ 2023-ի հունվարին մամուլում տեղեկություններ էին հայտնվել,  որ գործարար Արտակ Թովմասյանը մեծ պարտքեր է կուտակել, պատրաստվում է հյուրանոցում մեծ խաղատուն բացել և հույս ունի, որ խաղատուն բացելուց հետո կկարողանա դրանք մարել։ «Թովմասյան հիմնադրամ»-ից էլ խաղատանը վերաբերող լուրը չէին հերքել։

Անցել է 2,5 տարի, կազինոյի բացման մասին հայտարարություն չկա(չնայած «Դվինի» այցելուների համար նկատելի են լեդ էկրանների վրա խաղատնային  բիզնեսին առնվող գովազդներ), բայց կան համառ պտտվող լուրեր, որ իր ծրագիրն իրականացնելու համար գործարարը  «փայատեր-հովանավոր» է փնտրում  իշխանությունում։ 

Այս թեմաների հետ կապված մենք մի քանի հարց էինք ուղղել Արտակ Թովմասյանին, ով, ի դեպ, ամիսներով Հայաստանում չէր և վերադարձավ այն ժամանակ, երբ Ջենիֆեր Լոպեսը հյուրընկալվել էր իր հյուրանոցում, ում էլ  առիթ ունեցավ ծաղիկներ նվիրել․ Միջանցիկ նշենք, որ  Դվինում Լոպեսի մնալն ավելի շոշափվեց նրա հյուրանոցային համարից 19-րդ դարի կուժի անհետանալու պատմությունով,  և վերադառնալով մեր թեմային, ստորև ներկայացնենք մեր հարցերի պատասխանները, որ ստացել ենք Դվին հյուրանոցային համալիր ՓԲԸ Հասարակայնության հետ կապերի բաժնից։

Ըստ ասեկոսեների, Արտակ Թովմասյանը «փայատեր-հովանավոր» է փնտրում Ազգային ժողովում կամ  Կառավարությունում՝ առանց որեւիցե խնդրի Երեւանի սրտում՝ Կոնդի Սուրբ Հովհաննես եկեղեցու հարեւանությամբ կազինոյի գործարկման համար։ Խնդրում ենք հերքեք կամ հաստատեք լուրը։

Seven Vision Resort-ը գործում է միջազգային ստանդարտներին համահունչ եւ այսօր, հանդես գալով համաշխարհային լավագույն հյուրանոցային համալիրների հետ միեւնույն շարքում ու աշխատելով ՀՀ Օրենսդրության տառին համապատասխան, որեւիցե հովանավորչության կամ այլ ոչ օրինական գործողության կարիքը չի ունեցել եւ չունի։

Արտակ Թովմասյանը, տարիներ առաջ, Հետք.am-ին տված հարցազրույցում նշել է, որ ներդրումային ծրագրով խաղատուն չի լինելու է եւ որ իր թիմը բիզնես մոդելի մեջ հարմար չի գտնում կազինո ներառել: Ի՞նչն էր խանգարում Ձեզ այն ժամանակ՝ օրենքի պահանջներից բացի եւ ի՞նչ փոխվեց այս ընթացքում, քանի որ այսօր խոսակցություններ կան կազինոյի ներառման մասին։

2016 թվականին կար ընդունված այլ բիզնես մոդել՝ նույնպես 5 աստղանի հյուրանոցի, բայց ոչ այսքան ծավալուն եւ ոչ այս աստիճան մասշտաբային։ Տարիների ընթացքում այդ մոդելը վերաձեւափոխվեց, քանի որ Կառավարման խորհրդի կողմից ընդունվեց որոշում՝ կառուցելու ավելի մեծ մասշտաբի համալիր, որը միտված էր Հայաստանը  զբոսաշրջության համար ավելի հետաքրքիր դարձնել։ Այդ կոնցեպտի փոփոխման հետ մեկտեղ՝ եղավ առաջարկ դրա մեջ ներառել նաեւ խաղատուն, համաշխարհային չափորոշիչներին համապատասխան սպա, սպորտային ակումբ եւ այլ հարթակներ։

Եթե չեք փնտրում «փայատեր-հովանավոր» ԱԺ-ում կամ Կառավարությունում՝ ինչպե՞ս եք մտադիր ստանալ կազինոյի գործարկման թույլտվությունը եւ կա՞ արդյոք կառավարությանը ներկայացվելիք առաջարկ-նախագիծ՝ հաշվի առնելով, որ Շահումով խաղերի եւ խաղատների մասին ՀՀ օրենքով՝ խաղատուն կամ շահումով խաղ կամ անմիջականորեն (խաղասրահի միջոցով) ինտերնետ շահումով խաղ կարող է կազմակերպվել` ՀՀ կառավարության կողմից հավանության արժանացած 40 միլիարդ դրամից ավելի ներդրումային ծրագրի դեպքում` Հայաստանի Հանրապետության կառավարության սահմանած վայրերում եւ չափանիշներին համապատասխան:

Այս հարցը իր մեջ ներառում է նաեւ իր պատասխանը։ Ընկերությունն իրականացրել է անհամեմատ ավելի մեծ ներդրում, քան օրենքով նախատեսված է, եւ ելնելով այդ տրամաբանությունից՝ կարծում ենք որ, մեր գործունեությունը համապատասխանում է օրենքի պահանջներին ու այն ամենին, ինչը ՀՀ-ում եւ յուրաքանչյուր երկրում համահունչ է օրենսդրությանը, եւ պետք է որ լիցենզավորման եւ օրենքով նախատեսված այլ գործառույթների հետ խնդիր չլինի։

Կազինոն դեռ չկա, բայց կազինոյի գովազդ կա Դվին հյուրանոցի որոշ սրահների լեդ էկրաններին. ի՞նչն է գովազդվում՝ ապագայի կազինո՞ն, որ դեռ հայտնի չի՝ կլինի՞ կամ՝ չի լինի, թե՞ խաղալը կամ՝ որտե՞ղ խաղալը` եթե այս վերջին հարցով Ձեր աշխատակիցներին դիմում են գովազդը նկատած Ձեր հյուրերը՝ ի՞նչ տարբերակներ է առաջարկվում։

Հյուրանոցային համալիրի լեդ էկրաններին ժամանակ առ ժամանակ տեղադրվում են նոր նախագծերի վերաբերյալ տեղեկատվություն, որոնք ներառված են Seven Visions Resort-ի բիզնես զարգացման տրամաբանության մեջ։

Վիճակագրությունն ապացուցում է խաղամոլության կործանարար վնասների վերաբերյալ՝ այդ թվում ինքնասպանությունների մասին թվերի տեսքով։ Այսօր շատ երկրներում ՝ այդ թվում Հայաստանում պայքարում են խաղամոլության վտանգների եւ դրա առաջացրած վնասների դեմ։ Գնահատեք խնդրեմ՝ Երեւանի սրտում՝ բոլորին հայտնի վայրում կազինոյի հնարավոր բացումը այս համատեքստում։

Կարծում ենք՝ այս հարցի հասցեատերը մենք չենք. այդ տեսակի խնդիրներով զբաղվում են լիազոր պետական մարմինները։ Մենք գործում ենք օրենքի սահմաններում՝ բարեխիղճ եւ թափանցիկ, եւ մեր թիմի ամբողջ գործունեությունը միտված է կազմակերպել զբոսաշրջիկների համար մաքսիմալ հաճելի միջավայր ՀՀ-ում։