«Գնացել էի Բերդ խոշորացված համայնքի Չորաթան գյուղ։ Չնախատեսված մոտենում են ինձ, ասում՝ գեղագիտական կենտրոն կա, մի հատ մտեք, նայեք։ Ասում եմ՝ շատ լավ։ Երեխեքը բերում, շարում են իրենց նկարած նկարները։ Ասում եմ՝ ի՞նչ ես նկարել, ասում է՝ Մասիս սարը, մյուսը՝ Ցեղասպանության հուշահամալիրը»,- ՏՏ ոլորտի ներկայացուցիչների հետ հանդիպման ժամանակ ասել է ՀՀ վարչապետ Նիկոլ Փաշինյանը՝ շարունակելով․ «Էդ պահին նայում եմ պատուհանից, տեսնում՝ հոյակերտ սարեր են, անտառներ։ Վերադառնում եմ, գործընկերներիս ասում՝ նկարները ֆոտո արեք, տպեք։ Հետո մի խումբ մտավորականների եմ հրավիրում, ասում՝ կարա՞ք բացատրեք՝ ինչի՞ էս երեխեքը իրենց միջավայրում երևացող հոյակապ բնությունը չեն նկարում»։

«Գնում եմ Դիլիջան, քաղաքացուն ասում եմ՝ որտեղի՞ց ես, ասում է՝ Վանից, գնում եմ Արմավիր, ասում եմ՝ որտեղի՞ց ես, ասում է՝ Կարսից։ Իմ պրոբլեմը էդտեղ չի, որ ինքն իր արմատները գիտի, ուզում է պահպանել, իմ պրոբլեմն էն ա, որ ասում եմ՝ բա դիլիջանցին, արմավիրցին ո՞վ ա։ Ես չեմ ասում՝ մոռացիր, որ Վանից ես, ինձ պետք չի մոռանալ․ բայց դու Դիլիջանում ես ծնվել․ դիլիջանցի տերմինն անտեր մի՛ թող»,- ՏՏ ոլորտի ներկայացուցիչների հետ հանդիպմանը, «Պատմական Հայաստան»-«Իրական Հայաստան» թեմայով քննարկման ժամանակ, ասաց վարչապետ Նիկոլ Փաշինյանը՝ հավելելով․ «Ինձ ասում են՝ ուզում է պատմական Հայաստանը մոռանալ։ Ո՛չ, ես էդպիսի խնդիր չեմ դրել»։

***

«ՀՀ-ի ապագան պատկերացնում եմ իր միջազգային ճանաչված սահմաններով, բաց սահմաններով, խաղաղ, ժողովրդավարական և իրավական»,- ՏՏ ոլորտի ներկայացուցիչների հետ հանդիպման ժամանակ ասել է վարչապետ Նիկոլ Փաշինյանը՝ հավելելով, որ պետք է դադարեցնենք երազանքի հայրենիքի փնտրտուքը, որովհետև ՀՀ-ն մեր երազանքների հայրենիքն է, գտել ենք այն ու այլ հայրենիքի անհրաժեշտություն չունենք․ «Երբ որ մենք երազում ենք հայրենիքի մասին, կորցնում ենք հայրենիքը, իսկ երբ առերեսվում ենք, որ մեր երազանքին հասել ենք, հանդարտվում ենք ու կենտրոնանում գործի վրա»,- նշել է նա։