Հայաստանի ֆերմերներն ուրախ լուր ունեն: Նրանք հավաստիացնում են, որ Կառավարությունը կարողացել է խոչընդոտել թուրքական լոլիկի մուտքը Հայաստան:
«Գները կարգավորվել են: Շուկայում 90-95 տոկոս տեղական արտադրության լոլիկներ են: Նույնը նաև վարունգի դեպքում:
Խնդրում և պահանջում ենք, որպեսզի հետևողական լինեն: Այսպես եթե շարունակվի, կարծում եմ՝ կոնկրետ մեր գյուղից՝ Դարակերտից, ոչ ոք արտագնա աշխատանքի չի մեկնի: Մայիսի 10–ից 15–ը կսկսվի արտահանումը դեպի Ռուսաստան»,-լրագրողների հետ հանդիպման ժամանակ ասաց ֆերմեր Վարուժան Խուդեդանյանը:
Շարունակելով վերջինին՝ ֆերմեր Արմեն Սիմոնյանը նշեց.
«Որպեսզի կարողանանք ՌԴ-ի հետ պայմանագրային առևտուր կազմակերպել, պետք է բարձրացնենք մեր գյուղատնտեսության մակարդակը: Հայկական լոլիկը գերազանցում է թուրքականին՝ թե՛ համով, թե՛ տեսքով: Օգտակար նյութերը 2 անգամ բաձր են»:
Բանախոսները կարևորեցին գյուղացիների հետ Գյուղնախարարության անմիջական շփումը.
«Ֆերմերի հետ կլոր սեղանի շուրջ չեն նստել: Նրանք պետք է գան, ցեխոտեն ոտքերը, որից հետո էլ հարցին լուծում կլինի: Ի դեպ, ինֆորմացված չէ նաև գյուղացին: Մասնագիտական խնդիրներ կան: Առանց հասկանալու կարող են բույսին նյութ սրսկել ու տանել շուկա: Չունենք ճիշտ գյուղատնտեսություն»,-ընդգծեց Արմեն Սիմոնյանը:
