Պետական, հասարակական գործիչ, Հայոց նորագույն պետականության հիմնադիր, Առաջին Հանրապետության ներքին գործերի նախարար Արամ Մանուկյանի արձանի էսքիզի շուրջ աղմուկը չի դադարում:
Մրցութային հանձնաժողովի անդամ, նկարիչ Հաղթանակ Շահումյանն այսօր լրագրողներին որոշ մանրամասներ է ներկայացրել:
«Հունիս-հուլիս ամիսներին եղավ հանձնաժողովի առաջին նիստը, որի ժամանակ շատ քիչ էին մասնակիցները, տխուր վիճակ էր, որոշվեց նոր մրցույթ անցկացնել: Կարծեմ 10-11 աշխատանք էր ներկայացված երկրորդ փուլում: Փակ քվեարկություն էր, պարզվեց, որ շահել է Դավիթ Մինասյանը: Էլի բավարար չէր, բայց հույս կար, որ աշխատանքի ընթացքում ավելի կկատարելագործվի, քանի որ կար ճարտարապետական լուծում և այլն: Իսկ այն տարբերակը, որ համացանցում է ներկայացված՝ չի եղել, դրոշով չեմ տեսել: Կարծում եմ՝ արձանի վերջնական տարբերակն անգամ հեղինակը չի գտել: Պետք է բարի ու սրտացավ խորհրդատուներ լինեն»,-ասաց Հաղթանակ Շահումյանը:
