Այսօր կառավարության նիստում վարչապետ Կարեն Կարապետյանն անդրադարձավ «Զվարթնոց» օդանավակայանում ծառայություններ մատուցող տաքսիստներին: Ըստ նրա՝ մատուցվող ծառայությունները չեն համապատասխանում պահանջներին, և նրանց գործունեությունը խիստ մտահոգիչ է:
«Բոլորս էլ գիտենք անթրաշ, չստիկով, սիգարետը բերանին, Երևանյան լիճը Սևանա լճի փոխարեն ցույց տվող վարորդներին: Լիցենզիա տրամադրելու ժամանակ մենք պահանջում ենք, որ վարորդի տեսքը լինի պատշաճ»,- ասաց Կարապետյանը:
Նա հանձնարարեց Վլադիմիր Գասպարյանին ուժեղացնել լիցենզավորման գործընթացի հսկողությունը։
«Պարո'ն Գասպարյան, ձեզանից ակնկալում ենք շատ կոշտ քայլեր: Քսան, երեսուն հազար դրամով տանում են Մալաթիա- Սեբաստիայով պտտում, բերում են Երևանյան Լիճ` որպես Սևանա լիճ ցույց տալիս»,- ասաց վարչապետը:
Ոստիկանապետ Վլադիմիր Գասպարյանը հայտնեց, որ իրենք ամենօրյա աշխատանքով փորձում են կարգավորել դաշտը: «Մենք չենք կարողանում հասնել նրան, որ կասկածելի անցյալ ունեցող, ծանր հանցագործություններով դատապարտված, նարկոդիսպանսերում հաշվառված անձինք չստանան լիցենզիա: Այդ հարցը լուրջ անհանգստություն է առաջացնում: Մենք մաքրել ենք հոգեկան խնդիրներ ունեցող անձանց լիցենզիա տալը, մենք մաքրում ենք, բայց էլի լիցենզիաներ են տրվում»,- ասաց ոստիկանապետը:
Վարչապետն արձագանքեց.«Հստակ կանոնակարգեք այդ դաշտը: Մենք չպետք է բարդացնենք բիզնես դաշտը, բայց պետք են հստակ հայտանիշներ: Ապահովեք «Զվարթնոց»-Երևան տրանսպորտ, համապատասխան գնացուցակներ դրեք, որ ամեն մեկն ինչ գին ուզենա` չդնի»:
Վարչապետի այլ հանձնարարականների մասին՝ ստորև՝ տեսանյութերով:
