Life.panorama.am-ը գրում է, որ երգչուհի Անահիտ Սիմոնյանը պատմել է ամառային հանգստի եւ ամուսնու՝ Հայկոյի, ծննդյան անակնկալի մասին: Զույգը այս տարի որոշել էր հանգիստը կազմակերպել Արաբական Միացյալ Էմիրություններում. վայրի ընտրությունը Անահիտի համար խորհրդանշական է եղել.
«Ես եւ Հայկոն Դուբայում էինք եղել դեռ տարիներ առաջ, երբ հղի էի, այսինքն մեր փոքրիկ Արմանը Դուբայում եղել էր կրծքիս տակ, ուստի որոշեցինք, որ Արմանը առաջին անգամ կմենկի ծովափնյա հանգստի եւ առհասարակ առաջին անգամ ինքնաթիռ կնստի՝ ուղեւորվելով հենց Դուբայ»,- պատմեց երգչուհին:
Անահիտ Սիմոնյանը նկատեց, որ հանգիստն անցկացրել են սիրելի ընկերների հետ, իսկ փոքրիկ Արմանն էլ մեծ բավականությմաբ է վերադարձել առաջին ծովափնյա հանգստից. «Պետք է նկատեմ, որ այս անգամ հիմնականում վայելեցինք Հնդկական օվկիանոսը եւ Դուբայի ջերմ արեւը, այսինքն՝ ավելի պասիվ հանգիստ կազմակերպեցինք: Հանգստի ընթացքում այցելեցինք նաեւ «Dubai mall»-ում գտնվող հսկա ակվարիումը, ինչը Արմանը շատ հավանեց, խորհուրդ կտամ, որ բոլոր նրանք, ովքեր երեխաների հետ կլինեն Դուբայում, անպայման գնան եւ տեսնեն այդ հրաշք ակվարիումը, այնտեղ երեխաները կարող են հանդիպել իրենց մուլտֆիլմներից ծանոթ տարատեսակ ձկների»,- նշեց նա:
Անահիտը պատմեց նաեւ, որ հանգստի ընթացքում յուրօրինակ կերպով են նշել նաեւ ամուսնու ծննդյան օրը. «Քանի որ արդեն նախապես որոշել էինք, որ այս տարի Հայկոյի ծննդյան օրը լինելու ենք այնտեղ, ես, Հայկոյից գաղտնի, Դուբայի շատ գեղեցիկ ակումբներից մեկում սեղան էի ամրագրել, եւ մինչեւ վերջին րոպեն Հայկոն չգիտեր, թե ուր ենք գնալու: Ի ուրախություն մեզ՝ ակումբի աշխատակիցներն էլ, իմանալով, որ Հայկոյի ծննդյան օրն է, շատ գեղեցիկ կերպով մեզ դիմավորեցին»,- պատմեց երգչուհին:
Անդրադառնալով աշխատանքին՝ Անահիտ Սիոմնյանը նկատեց, որ այս պահին աշխատում է իր նոր երգի վրա, որը շուտով նաեւ տեսահոլովակ կունենա. «Արդեն պատրաստ է նոր երգս, որի հիման վրա շուտով կնկարահանենք նոր տեսահոլովակ, այն մինչ դեկտեմբեր կփորձեմ հանձնել իմ հանդիսատեսին»,- նշեց նա:
Իսկ ահա որպես ոճաբան՝ Անահիտ Սիմոնյանը իր բրենդի սիրահարների համար նշեց. ««Anahit Simonyan Fashion Boutuque-Atelier»-ը մոտավորապես մեկ շաբաթից կներկայացնի նոր՝ աշուն-ձմեռ տեսականին, որտեղ ներկայացված կլինեն նաեւ Եղիշե Չարենցի «Ես իմ անուշ Հայաստանի» բանաստեղծությամբ իմ ստեղծած կտորները: Նոր տեսականու շրջանակներում բացի այն կոշիկներից, որոնք արդեն կան, կլինեն նաեւ երկարաճիտ կոշիկներ: Ինչպես նաեւ, այս տարի մի նոր միտք կներկայացնեմ, որի մասին դեռեւս չեմ բարձրաձայնի»:
