Օրերս ԿԸՀ-ն հայտարարել էր, թե «Ծառուկյան» դաշինքի 23 թեկնածուներ, ինքնաբացարկի դիմումով, հրաժարվել են մանդատներից: Սակայն երեկ 23 հրաժարվողից 12-ն հայտարարեցին, թե իրենք ոչ մի դիմում էլ չեն գրել և պայքարելու են իրենց մանդատների համար:
«Ազգային ժողովում «Ծառուկյան» և «Ելք» դաշինքների կողքին կլինի նաև «Բրուտոսի» անվան դաշինք»։ Եթե այդ ակցիան Ծառուկյանի խնդրանքով չէ, ուրեմն դասալքություն է, դավաճանություն է, բրուտոսություն է։ Ընդհանրապես հիմա Հայաստանում մոդա է, բավականին լուրջ բրուտոսականության շարժում է»,-լրագրողների հետ հանդիպման ժամանակ նման կարծիք հայտնեց Գերագույն խորհրդի նախկին պատգամավոր Ազատ Արշակյանը:
Քաղտեխնոլոգ Վիգեն Հակոբյանի կարծիքով էլ՝ մանդատ ստանալուց հետո այս 12 հոգին կլքեն խմբակցությունն ու ամենայն հավանականությամբ, կլինեն անկախ պատգամավոր:
«Նոր Սահմանադրությամբ այս պատգամավորները չեն կարողանա նոր խմբակցություն ստեղծել, բայց հնարավոր կլինի անկախ պատգամավորի ստատուսով հանդես գալ»,-ընդգծեց քաղտեխնոլոգը:
Նա չբացառեց, որ այս քայլին ոմանց դրդմամբ են գնացել.
«Ոչ բոլորն էին նախկինում նման քաջություն ցուցաբերում, և եթե չլինեին նրանց թև տվողներ, չեմ կարծում, որ նման քայլի գնային»,-նշեց Վիգեն Հակոբյանը:
Անի Կարապետյան
