Աբովյան քաղաքում գործող Թիվ 6 մանկապարտեզը հայտնվել է օլիգարխների «ուշադրության կենտրոնում». մանկապարտեզի տարածքում մասնավոր կառույցի շինարարություն է սկսվել, մանկապարտեզին պատկանող հսկայական կանաչապատ տարածքի հաշվին: Այս մասին Asekose.am-ի ընթերցողներից մեկը տեղեկացրեց կայքին նշելով, որ քաղաքապետ՝ Վահագն Գևորգյանը, որոշել է հենց այդ հատվածում կառուցել իր հսկայական ու շքեղ առանձնատունը:
Ըստ մեր աղբյուրի՝ վերջինս չի բավարարվել իրեն հասանելի տարածքից և որոշել է, որ «ճիշտ է» նաև ահռելի տարածք վերցնել մանկապարտեզին պատկանող կանաչապատ տարածքից: Այդպիսով մանկապարտեզի պարիսպները զգալի չափով հետ են տարվել և վերոնշյալ տարածքում շինարարություն է սկսվել, իսկ քաղաքապետն էլ իրեն հատուկ ուշադրությամբ ամեն առավոտ այցելում է նախկին կանաչապատ տարածք ու հետևում, թե ինչպես է ընթանում իր առանձնատան կառուցումը:
Asekose.am-ը կապ հաստատեց Աբովյան քաղաքի Հասարակայնության կապերի պատասխանատու Նժդեհ Հովսեփյանի հետ , ով հանդես եկավ գրավոր պատասխանով , որը ստորև ներկայացնում ենք Ձեր ուշադրությանը՝ առանց խմբագրման:
Ի պատասխան Ձեր գրավոր հարցմանը՝ հայտնում ենք հետևյալը.
Աբովյանի Թիվ 6 մանկապարտեզի տարածքի որևէ սանտիմետր օտարված չէ։ Մանկապարտեզի տարածքում որևէ շինարարություն չի ընթանում։ Շինարարությունն ընթանում է մանկապարտեզի հարևանությամբ` մասնավոր սեփականություն հանդիսացող տարածքում, իսկ շինարարությունը կատարվում է սեփականատիրոջ կողմից՝ հաստատված շիննախագծով և օրինական շինթույլտվությամբ։
Տվյալ տարածքը չի պատկանում Աբովյան համայնքի ղեկավար Վահագն Գևորգյանին կամ նրա ընտանիքին։ Համայնքի ղեկավարի և նրա ընտանիքի ունեցվածքին ու կարողությանը կարող եք ծանոթանալ Բարձրաստիճան պաշտոնատար անձանց էթիկայի հանձնաժողովին ներկայացված համապատասխան հայտարարագրում։
Հեղինակ՝ Ա. Հարությունյան
