ԱԱԾ դիմակավորված աշխատակիցները շրջափակել են Երկրապահ կամավորականների միության Էջմիածնի տարածքային կառույցի շենքը:
Տվյալ շենքում է գտնվում նաև ԱԺ ՀՀԿ խմբակցության ղեկավար Վահրամ Բաղդասարյանը, ով, սակայն, լրագրողների հետ զրույցում նշել է, որ ԱԱԾ-ն ներսում չի եղել:
«Ես եկել էի ճշտում անելու, ներսում հանգիստ է, որևէ գործողություն չկա»,- նշել է Վահրամ Բաղդասարյանը:
Հիշեցնենք, որ ավելի վաղ ԱԱԾ մամուլի խոսնակ Սամսոն Գալստյանը հաստատել էր, որ ԱԱԾ-ն գործողություններ է իրականացնում Էջմիածնում, այդ թվում ՀՀԿ-ական պատգամավոր, գեներալ Մանվել Գրիգորյանի, ինչպես նաև քրեական հեղինակություն Դոն Պիպոյի՝ Արթուր Ասատրյանի առանձնատանը:
Հիշեցնենք նաև, որ Էջմիածնում ցույցեր են իրականացվում ընդդեմ Մանվել Գրիգորյանի և նրա որդու՝ Կարեն Գրիգորյանի: Էջմիածնի փողոցները երեկվանից փակ են:
Նշենք, որ ավելի վաղ Նիկոլ Փաշինյանն իր ֆեյսբուքյան էջում անդրադարձել էր Էջմիածնում տեղի ունեցող իրադարձություններին:
Նա մասնավորապես գրել էր. «Անընդունելի է, որ քրեածին տարրերը պղծեն սիրո և համերաշխության հեղափոխության խորհրդանիշները և հեղափոխության անունը օգտագործեն մաֆիոզ պատերազմներում: Թույլ չենք տա»:
Նշենք, որ այսօր Դոն Պիպոն բաց նամակով դիմել է վարչապետ Նիկոլ Փաշինյանին:
Կարդացեք նաև՝ Դոն Պիպոն բերման ենթարկվեց
Դոն Պիպոյի պատճառով իմ երեխան դեռևս չի տեսել իր հորը. Անաիս Սարդարյան
