Օրերս զբոսնում էի Օպերայի մոտ, մեկ էլ տեսնեմ մի աժիոտաժ է սկսվել, մի իրարանցում, մի Սոդոմ-Գոմոր… Միհրան Ծառուկյանին բռնացրել էր մի քանի տասնյակ մալալետկա երկրպագուհիների մի խառնամբոփ ու խառնվել էր իրար։ Հերթական անգամ խորը տարակուսանք զգացի, որովհետև ես վստահ եմ, որ Միհրան Ծառուկյան կերպարը մեր շոու բիզնեսի ամենամեծ թյուրիմացություններից մեկն է և չեմ հասկանում, թե բացի բարետես արտաքինից, այս տղան ինչով կարող է դուրս գալ հանդիսատեսին։ Ահա 5 պատճառ, թե ինչու եմ ես այդպես համար։
1. Միջակ երգիչ
Գիտեմ, որ հեսա մալալետկա երկրպագուհիները ինձ խաչելու ու խարույկի վրա այրելու ցասումնալից մեկնաբանություններ կգրեն, բայց ցավոք, ստիպված եմ արձանագրել, որ Միհրան Ծառուկյանը՝ որպես երգիչ, բացարձակ միջակություն է, եթե չասեմ ավելին։ Չունի ոչ մի երևելի ոկալային տվյալներ, ոչ էլ ինչ որ յուրահատուկ ձայնային առանձնահատկություններ, որոնք նրա երգեցողությունը կկարողանային գրավիչ դարձնել։
2. Պլաստիկայի ի սպառ բացակայություն
Տեսե՞լ եք երբևիցե, թե ինչպես է պարում ու շարժվում Միհրան Ծառուկյանն՝ իր տեսահոլովակներում։ Ամեն անգամ այդ պատկերը տեսնելիս, ակամայից հիշում եմ ռուսական հայտնի խոսքը, երբ ինչ որ մեկի անփույթ, ոչ ճկուն, ծանր շարժուձևին, ինչպես նաև այս կամ այն իրավիճակում անզգույշ ու հախուռն գործելուն գնահատական տալով, ասում են «ինչպես փիղը՝ ֆարֆորի խանութում»։ Միհրանը ծանր է, զուրկ է պլաստիկայից ու խորեոգրաֆիկ աղետ է։
3. 0-ական խարիզմա
Սա հատկապես վառ երևում է Վարդայի հետ համատեղ թողարկած տեսահոլովակում, որը դիտելիս մարդու քուն է տանում՝ այնքան իներտ ու անհետաքրքիր է Միհրանը։ Պետք չէ խառնել բարետեսությունը՝ խարիզմայի հետ, դրանք միանգամայն տարբեր բաներ են։ Մարդը կարող է ունենալ համեստ արտաքին տվյալներ, բայց վառ արտահայտված խարիզմա, կամ էլ, ինչպես Միհրանի պարագայում է՝ ունենալ լավ արտաքին տվյալներ, բայց ի սպառ զուրկ լինել էդ անտերից։ Գուցե համարեք, որ սխալվում եմ, բայց Միհրան Ծառուկյանին ես մենակ էն իրա գովազդային պաստառների ժպտացող բարետես երիտասարդի դեմքով եմ պատկերացնում։
4. Աղքատիկ ու անճաշակ ռեպերտուար
Բացի նրանից, որ Միհրան Ծառուկյանը միջակ երգչակ է, նա նաև աղքատիկ երգացանկ ունի, այն էլ՝ համեմված էժանագին ու տափակ կատարումներով։ Ասենք լրիվ «խոպանչիները կսիրեն» ժանրի ներկայացուցիչ է, ինչպես ասենք նույն Վաչե Ամարյանն ու Լիլիթ Հովհաննիսյանը։ Ոչ մի լուրջ երգ, ոչ մի արժեք ներկայացնող կատարում ես դեռ չեմ հանդիպել Միհրանի մոտ։
5. (չ)Դերասանություն
Շարունակելով խարիզմայի թեման, ցանկանում եմ նշել, որ բացի (չ)երգիչ լինելուց, Միհրանը նաև (չ)դերասան է։ Ըստ էության, Միհրան Ծառուկյանի դերասանական խաղը արտահայտվում է նրա դեմքի արտահայտության երեք տիպի փոփոխությունով. ժպտացող Միհրան Ծառուկյան, տխուր Միհրան Ծառուկյան և զայրացած Միհրան Ծառուկյան։ Ձանձրալի է հետևել նրա մարմնավորած հերոսներին, որովհետև նախ դրանք անփոփոխ են՝ անկախ նրանից, թե ինչ ֆիլմում, կամ հոլովակում է նա, հետո էլ՝ վերադառնալով նույն խարիզմայի հարցին, նա չի կարողանում դրսևորել բացի իր արտաքին տվյալներից, որևիցե քիչ թե շատ ակնառու բան, երբ խաղում է այս կամ այն դերը։
Այս բոլոր կետերը միասին, ստիպում են ինձ, որպեսզի ես ասեմ, որ Միհրան Ծառուկյանը անիմաստ գերարժևորված կերպար է մեր շոու բիզնեսում և նույնիսկ թյուրիմացություն։
Հիշեցում Asekose.am-ի կողմից` բլոգերների ու համացանցի օգտատերերի գրառումները ներկայացվում են առանց խմբագրման:
