Նավավար ձկնալի ըմպելարանում տեղի ունեցավ «Հարավային կովկասի ձեռնարկատերերի դեմքերն ու պատմությունները» գրքի շնորհանդեսը: Գիրքը հրատարակվել է Հարավային Կովկասում շվեյցարական համագործակցության գրասենյակի գործունեության 15-ամյակին ընդառաջ։ 1999 թ.-ից ի վեր Շվեյցարիան աջակցում է Հայաստանում, Վրաստանում եւ Ադրբեջանում տնտեսական ու քաղաքական բարեփոխումների իրականացմանը Շվեյցարական զարգացման ու համագործակցության գրասենյակի ու Տնտեսական հարցերի պետական քարտուղարություն միջոցով։
Գիրքը պատմում է տարածաշրջանի երեք երկրներից չորսական ձեռնարկատերերի մասին ու հրավիրում է ընթերցողներին ծանոթանալ հասարակ մարդկանց, ովքեր քաջություն են ունեցել քայլ անելու ու հաջողության հասնելու՝ կիրառելով նորարական մոտեցումներ իրենց նպատակներին հասնելու համար։
Շվեյցարական զարգացման ու համագործակցության գրասենյակը խթանում է գյուղական տարածքների զարգացումը Հարավային կովկասի երեք երկրներում՝ նպատակ ունենալով ապահովել ավելի լավ ու մշտական եկամուտ գյուղական տնտեսությունների համար։ Շվեյցարիայի մոտեցումն աջակցության տրամադրմանը հիմնվում է համագործակցության վրա. մեծապես կարեւորվում է կայունության ապահովումը։
Միջոցառումն իր ներկայությամբ պատվել էր ՀՀ-ում Շվեցարիայի արտակարգ և լիազոր դեսպան պրն. Լուկաս Գասերը, ով իր խոսքում նշեց, որ պատիվ ունի ներկայացնելու մի գիրք, որը ներկայացնում է Հարավային Կովկասի ձեռնարկատերերի դեմքերն ու պատմությունները:
«Այս գիրքը պատմում է տասներկու տարբեր մարդկանց մասին, ովքեր հաջողություն են ունեցել ու սերում են տարբեր երկրներից` Հայաստանից, Վրաստանից և Ադրբեջանից: Նրանք շատ խիզախ մարդիկ են, ովքեր իրենց կյանքի տարբեր փուլերում չեն վախեցել, այլ որոշել են իրենց ճակատագիրը վերցնել իրենց ձեռքը` իրենց հույսը չդնելով հաջողակ պատահականության վրա: Ես ցանկանում եմ, որ դուք ևս մեկ անգամ լսեք խիզախ բառը, քանի որ բիզնես սկսելն ու հիմնադրելը ոչ միայն դժվար է Հայաստանում, այլ նաև Շվեցարիայում և նույնիսկ ԱՄՆ-ում: Բիզնես սկեսելու համար մարդուն անհրաժեշտ է խիզախություն:2012 թվականի դրությամբ Հայաստանում գոյություն ունեն 70.000 փոքր և միջին ձեռնարկություններ, ինչը 2010 թվականի համեմատ 25%-ի աճ է գրանցել: Սա խոսում է այն մասին, որ Հայաստանում զարգանում է փոքր և միջին բիզնեսը, ինչը խոսում է նրա մասին, որ նրանց տերերը շատ մեծահարուստ մարդիկ չեն, որոնցից մեծ քաջություն է պահանջվում և ոչ ոքս վստահ չենք, թե ինչ կլինի այդ բիզնեսը մի քանի տարի հետո: Այս գիրքը ներկայացնելուն զուգահեռ ցանկանում եմ խոսքս ուղղել ՀՀ կառավարությանը, որպեսզի ավելի մեծ ուշադրություն դարձնեն փոքր և միջին բիզնեսի զարգացմանը: Շվեցարիայում կառավարությունը մտածում է փոքր և միջին ձեռնարկությունների զարգացման մասին, այնինչ շատերս հաճախ մտածում ենք հսկա կազմակերպությունների մասին: Արդեն երկու տարի է, ինչ ես աշխատում եմ Հայաստանումև այդ ընթացքում ես հասկացել եմ մի բան` յուրաքանչյուր հայ մարդու մեջ թաքնված է դերասան, մշակույթի մարդ, քաղաքական գործիչ: Ես վստահ եմ, որ հայ ժողովուրդն ունի բոլոր նախադրյալները հետագայում հաջողակ լինելու համար: Դա է պատճառը, որ մենք մեր գրքում ներառել ենք չորս հայերի, ովքեր հաջողություն են ունեցել և փորձում են այս գիրքը հրատարակելու միջոցով հանրությանը ցույց տալ, որ հաջողության հասնել հնարավոր է, պարզապես պետք է սեփական ճակատագիրը պահել սեփական ձեռքերում»,- իր խոսքը եզրափակեց ՀՀ-ում Շվեցարիայի արտակարգ և լիազոր դեսպան Լուկաս Գասերը:
Հեղինակ՝
Անահիտ Հարությունյան
Տեսանյութը կներկայացնենք ավելի ուշ:
