«Վաճառում են տարբեր տեսակի ճայթուկներ, որոնք կասկածելի ծագում ունեն, խորհուրդ եմ տալիս օգտագործել միայն լիցենզավորված ճայթուկներ՝ խուսափելով անհայտ ծագման նյութերից: Պարտադիր է նաև հայերեն նշագրումը, քանի որայդ դեպքում օգտագործման կանոնները նշված են: Պետք է հստակ նշված լինի, թե ինչպես այն օգտագործել, խոտանի դեպքում ինչ անել, հակառակ դեպքում խորհուրդ չի տրվում տվյալ ապրանքատեսակն օգտագործել»,-այսօր՝ լրագրողների հետ հանդիպման ժամանակ խոսելով հրդեհային անվտանգության կանոններից՝ ասաց ՏԿԱԻՆ պետական և տեխնիկական անվտանգության տեսչության քարոզչության բաժնի պետ Սերգեյ Հայրապետյանը:
Խոսելով ամեն տարի գրանցվող դեպքերի մասին՝ ՏԿԱԻՆ պետական և տեխնիկական անվտանգության տեսչության քարոզչության բաժնի պետը նկատեց.
«Տարեկան հրավառություններից ունենում ենք ամենաքիչը 4-5 վնասվածքի դեպք, ուստի հորդորում ենք խիստ պահպանել անհրաժեշտ անվտանգության կանոնները»:
Ինչ վերաբերում է եղևնիներին, Սերգեյ Հայրապետյանը նշեց, որ դրանք անհրաժեշտ է տեղադրել ելքից հեռու և չզարդարել հեշտ բռնկվող նյութերով:
