Բլոգեր Արամ Գևորգյանի ֆեյսբուքյան գրառումը․ «Մխչյանի դպրոցում տեղի ունեցած աղմկահարույց դեպքով ևս ունենք «բերնեբերան՝ հազար բերան»-ի էֆեկտ։
Ի սկզբանե ասվում, տարածվում էր, որ բարձր դասարանցիները կապկպել, թմրանյութ են տվել ցածր դասարանցիներին, ինչից հետո վերջիններիս մոտ կախվածություն է առաջացել ու սկսել են տնից փող գողանալ, որ նոր դոզա առնեն...
Սա հենց սկզբից ինձ տարօրինակ թվաց, որովհետև թմրանյութերից կախվածությունը, այն էլ 4-րդ դասարանի երեխայի մոտ, տենց չի կարա զարգանա։ Բայց, որ միջադեպ եղել է, դա փաստ է, ձերբակալված էլ կա, բայց այլ հոդվածով։ Դեպքը եղել է այսպես. բարձր դասարանցիները փոշենման զանգված են քսել ցածր դասարանցու քթանցքներին՝ ասելով, որ դա թմրանյութ է ու դա «օգտագործելու» փաստը չհրապարակելու համար գումար են պահանջել։ Սա է եղել իրականությունը։ Հիմա տոքսիկոքիմիական փորձաքննություն է իրականացվում՝ պարզելու համար դա եղել է թմրանյո՞ւթ, թե՞ ոչ։ Այս պահին ձերբակալված կա շորթման հոդվածով։
Ես գրեթե վստահ եմ, որ եղածն ընդամենը լակոտություն է ու ոչ մի թմրանյութ, այն էլ սպիտակ փոշենման, չէր կարող լինել դրանց մոտ։
Մեկ այլ զարմանալի փաստ, որ այդ դեպքի առթիվ ենթադրյալ տուժող կողմի ծնողները հաղորդում չեն ներկայացրել...»։

***

Մխչյանի միակ դպրոցի տնօրենը հրաժարական է տվել, նոր պաշտոնակատարը մխչյանցի է, հարակից բնակավայրի դպրոցներից մեկի փոխտնօրենն է եղել, «Ազատությանը» փոխանցել է Արարատի մարզպետարանի հանրակրթության վարչության պետ Մարտուն Մանուկյանը:

Քննչական կոմիտեն մինչև այսօր չի հերքել նախորդ շաբաթ տարածված տեղեկությունը, թե Մխչյանի դպրոցի բարձր դասարանի մի քանի աշակերտներ 4 ամիս շարունակ հետապնդել են 4-րդ դասարանի երկու երեխաների, ստիպողաբար նրանց շուրթերին թմրանյութի նմանվող ճերմակ փոշի քսել՝ այդպիսով փորձելով նրանց մոտ կախվածություն առաջացնել ու ստիպել, որ տնից գումար բերեն:

Կոմիտեից հայտնում են՝ գործով 4 մեղադրյալ կա: 1 ամիս շարունակ նրանցից երկուսը կմնան տնային կալանքում, մյուս երկուսը՝ վարչական ու դաստիարակչական հսկողության տակ:

Հարցին՝ հայտնաբերվե՞լ է արդյոք նրանցից 3-րդը, որին ոստիկանները փնտրում էին, կոմիտեից փոխանցեցին՝ արդեն տնային կալանքում է: Մեղադրյալներից երեքը 11-րդ դասարանցիներ են՝ անչափահաս, մյուսը՝ 12-րդ դասարանցի, 18 տարեկան՝ չափահաս: