ՆյուզՊրեսս-ը գրում է․ «Հունվարի 14-ին հրապարակում էինք արել այն մասին, որ ՆԳ նախկին նախարար Վահե Ղազարյանը 3 անշարժ գույք է նվեր ստացել տարբեր ազդեցիկ դեմքերից:
Գրել էինք նաև, որ, մեր տեղեկություններով, այդ բնակարաններից առնվազն երկուսը նա գրանցել է Տաշիր Սամոյի մորաքրոջ որդի, ռեստորանային գործարար, Ղազարյանի մտերիմ Արմեն Իսկանդարյանի անունով:
Այս հրապարակումից հետո Գլխավոր դատախազությունից հետաքրքրվել էինք, թե ինչ ընթացք է տրվել դրան: Ի պատասխան Դատախազությունից նշել են.
«Ի պատասխան Ձեր հարցման` հայտնում ենք, որ Ձեր կողմից նշված մամուլի հրապարակումները ուղարկվել են ՀՀ հակակոռուպցիոն կոմիտե՝ դրանցում նշված հանգամանքներն «Օպերատիվ-հետախուզական գործունեության մասին» ՀՀ օրենքով սահմանված կարգով օպերատիվ- հետախուզական միջոցառումների իրականացման միջոցով ստուգելու նպատակով»:
Հետևողական ենք լինելու, որպեսզի Հակակոռուպցիոն կոմիտեն հավուր պատշաճի ուսումնասիրություն կատարի և տրվի նշված կոռուպցիոն գործարքների իրավական գնահատականը, իսկ մենք շարունակելու ենք բացահայտել Վահե Ղազարյանի կողմից կատարված ենթադրյալ այլ ապօրինությունները»:
