151 տարի առաջ՝ այս օրը, ծնվել է հայ զորահրամանատար, պետական գործիչ, ֆիդայապետ (հայդուկապետ) Անդրանիկ Օզանյանը:
«Նա մարդ էր, ով իր ամբողջ կյանքը նվիրեց ժողովրդի ազատագրության պայքարին: Եթե այսօր Զանգեզուրը ՀՀ կազմում է, դա նրա շնորհիվ է: Վիճահարույց հարցեր էլ շատ կան՝ օրինակ, թե ինչու նա չմասնակցեց Ղարաքիլիսայի ճակատամարտին: Եթե Անդրանիկը 1918 թվականին Շուշին գրավեր՝ պատմությունը կարող է այսօր այլ կերպ լիներ: Արցախը կլիներ ՀՀ կազմում, բայց, թե ինչպես կարողացան 2 անգլիական զինվորներ համոզել այդքան փորձված մարդուն ու Շուշի հասնող զորքը կանգնեցնել, մինչ օրս ես չեմ կարող բացատրել,գուցե Եվրոպային էր հավատում, գուցե Փարիզի համաժողովին, որ Արցախի հարցը կլուծվի: Ամեն դեպքում, 100 տարվա հեռավորությունից դժվար է հասկանալ: Ցավալի է, որ նա ոչ մի հուշ չի թողել իր ապրումների մասին»,-այսօր՝ լրագրողների հետ հանդիպման ժամանակ ասաց Ազգային արխիվի տնօրեն Ամատունի Վիրաբյանը:
Ազգային արխիվի տնօրենը նկատում է՝
«Անդրանիկը լեգենդ էր: 35 տարի կռված մարդը երբեք վիրավոր չի եղել: Թուրքերը հավատում էին, որ գնդակը նրան չի դիպչում: Միայն Անդրանիկի անունը լսելը բավական էր, որ նրանք փախչեին»:
Անի Կարապետյան
