Armeniasputnik.am-ը գրում է. Հայաստանի և Ադրբեջանի առաջնորդները 1999 թվականի հոկտեմբերին առաջին անգամ բանակցեցին երկու երկրի սահմանին, որը, չնայած հրադադարին, շարունակում էր ճակատային գիծ համարվել։
Ռոբերտ Քոչարյանն ու Հեյդար Ալիևը շփվեցին զինվորական վրանում, որը տեղակայվել էր Հայաստանի սահմանի դիրքերի մոտ։ Քոչարյանը ստիպված եղավ փոքր-ինչ սպասել գործընկերոջը։ Ալիևը քաղաքավարի ներողություն խնդրեց և ուշացումը բացատրեց այսպես` վաղուց չէր եղել այս կողմերում։ Նրա խոսքով` ամեն գյուղում ստիպված էր եղել կանգնել ու շփվել բնակիչների հետ, որոնք ցանկացել էին անպայման ոչխար մորթել բարձրաստիճան հյուրի առաջ։
Քոչարյանը ժպիտով հետաքրքրվեց` իսկ հետները ոչխար բերե՞լ են։ Ալիևը պատասխանեց, որ ամեն ինչ անպայման կլինի, երբ նրանք կարողանան վերջանական պայմանավորվածության հասնել ղարաբաղյան հակամարտության հարցում։ Ադրբեջանի պատվիրակության կազմում էր նաև Իլհամ Ալիևը։
Ողջույնի խոսքում Հեյդար Ալիևն ասաց` բարի գալուստ Ադրբեջան` ընդգծելով, որ բանակցությունների վայրը Նախիջևանի ինքնավար հանրապետությունն է։ Քոչարյանն էլ իսկույն արձագանքեց. «Նշանակում է` սա իմ առաջին այցելությունն է Ադրբեջան»։
ՆՏՎ-ի հետ համատեղ իրականացվող «Ժամանակի մեքենա» նախագծի շրջանակում ներկայացնում ենք այդ հանդիպման տեսանյութը։
Նյութը՝ սկզբնաղբյուր կայքում
