Վրացի դեռահասների մի խումբ որոշել է չար կատակ խաղալ Թբիլիսիի առանց այն էլ խուճապահար բնակիչների գլխին: Դեռահասները բարձրախոսներով վագրի մռնչյունի ձայնագրություն են միացրել, գրում է Лента-ն՝ ՆԳՆ մամուլի կենտրոնի ղեկավար Նինո Գիորգոբիանիին հղումով։
«Պալիաշվիլի փողոցից հաղորդագրություն է ստացվել, որ մարդիկ վագրի ձայն են լսում։ Դեպքի վայր է մեկնել ոստիկանությունը։ Պարզվել է, որ դեռահասները ձայնագրել են վագրի մռնչյունը և միացրել փողոցում՝ բաց պատուհանին դնելով բարձրախոսները»,- հայտնել է Գիորգոբիանին։
Արդյունքում՝ երեխաները ծնողների հետ կանչվել են ոստիկանություն։ «Ամբողջ օրվա ընթացքում բազմաթիվ կեղծ կանչեր են հնչել։ Հույս ունեմ, այլևս ոչ ոքի մտքով չի անցնի նման կերպ կատակել»,- ասել է ՆԳՆ ներկայացուցիչը։
Ինչպես արդեն տեղեկացրել ենք՝ Թբիլիսիի ջրհեղեղի ժամանակ կենդանաբանական այգուց անհետացած մի քանի վտանգավոր կենդանիներ՝ վագրը և բորենին, դեռ չեն հայտնաբերվել: Վրաստանի իշխանությունները կոչ են անում Թբիլիսիի բնակիչներին զգույշ լինել, իսկ Երկրի վարչապետը հայտնել է, որ փրկարարական ջոկատները չեն դադարեցրել կենդանիների որոնման աշխատանքները։
