Ընդդեմ կանանց նկատմամբ բռնության կոալիցիայի հայտարարությունը՝ Սյուզի Գևորգյանի հանդեպ կատարված բռնության վերաբերյալ
Սույն թվականի հունվարի 5-ին, ժամը 19:00-ի սահմաններում, Կասյան փողոցում երկու հաղթանդամ տղամարդ հարձակում է գործել «Նոր Հայաստան» ճակատի աջակից, ռուսաստանաբնակ Սյուզի Գևորգյանի վրա` նրան հասցնելով մարմնական վնասվածքներ: Աղջիկն այժմ հիվանդանոցում է՝ գլխուղեղի ցնցումով և բազմաթիվ այլ վնասվածքներով:
Սա արդեն երկրորդ դեպքն է, որ Սյուզի Գևորգյանի հանդեպ բռնություն է գործադրվում՝ կապված նրա քաղաքացիական դիրքորոշման հետ: Ավելին, այս անգամ նրան սպառնացել են և հորդորել դադարեցնել գործունեությունը Հայաստանում, այլապես ավելի խիստ են պատժելու:
Սյուզի Գևորգյանի նկատմամբ երկրորդ հարձակումը ՀՀ իրավապահ մարմինների անգործության հետևանքն է, ինչի արդյունքում էլ ավելի է խորանում անպատժելիության մթնոլորտը, որն էլ նոր հանցագործությունների իրականացման և արդարադատությունից խուսափելու հիմք է դառնում մի շարք անձանց համար:
Այս բռնարարքը վկայությունն է նրա, որ քաղաքական և քաղաքացիական գործունեություն մեջ ակտիվ կանանց նկատմամբ բռնությունը Հայաստանում ահագնանում է, ինչն առավել խոցելի է դարձնում կին ակտիվիստների, հասարակական գործիչների և իրավապաշտպանների դիրքերը, միևնույն ժամանակ տարածվելով նրանց երեխաների ու ընտանիքների մյուս անդամների վրա:
Ընդդեմ կանաց նկատմամբ բռնության կոալիցիան խիստ դատապարտում է 23-ամյա Սյուզի Գևորգյանի հանդեպ բռնության դրսևորումը և նպատակ հետապնդելով կանխարգել քաղաքացիական հասարակության ներկայացուցիչների հանդեպ նման հանցագործությունները, կոչ է անում իրավապահ մարմիններին շուտափույթ գտնել հանցագործներին ու պատժել օրենքի ողջ խստությամբ:
Փոխե′նք մթնոլորտը մեր երկրում, թույլ չտա′նք բռնության արմատավորումը մեր հասարակության մեջ:
Ընդդեմ կանաց նկատմամբ բռնության կոալիցիա
