Հայաստանի Գրողների միության շենքի հարակից տարածքում կատարվող շինարարական աշխատանքերն ու ցուցանակը անցորդներին մոտ երեք ամիս է՝ հուշում են, որ շուտով «Գրողների այգի» ենք ունենալու: Բայց, մինչ շինարարական աշխատանքները կավարտվեն, որը շինարարների փոխանցմամբ՝ կլինի մոտ 10 օրից, ստիպված ենք լինելու լսել բազում ասեկոսեներ՝ հավատալով կամ չհավատալով դրանց: Օրինակ՝ ոմանք ասում են, որ այնտեղ սրճարան է լինելու, ոմանց սարսափեցնում է բետոնը, որ «կուլ է տվել» ծառերը և այլն:
ՀԳՄ քարտուղար Պետրոս Դեմիրճյանի մեզ հետ զրույցում ասաց, որ տարածքը վարձակալությամբ են տվել, հիմա բարեկարգման աշխատանքներ են կատարվում.
«Մեր պահանջն այն է, որ լինի գրական-մշակութային վայր, լինի տաղավար, որպեսզի գրողները նստեն, ընթերցանություններ կազմակերպվեն և այլն»,-ասաց նա:
Դեմիրճյանը հերքեց տարածված ասեկոսեները՝ կապված սրճարանի հետ, իսկ ինչ վերաբերում է ծառերին, ապա դրանք, նրա խոսքով, տնկել են արտասահմանցի պատվիրակները և շինարարությունից հետո կրկին կդրվեն:
Եղանք նաև շինհրապարակում և սրճարանի լինել-չլինելու հարցին շինղեկը նույնպես պատասխանեց, որ սրճարան չի լինելու, ավելին՝ խորհուրդ տվեց կարդալ ցուցանակի վրա գրվածը, քանի որ նրա խոսքով՝ լինելու է այն, ինչ գրված է: Ասել է թե՝ «Գրողների այգում» նախատեսվում է տեղադրել հայ բանաստեղծներին նվիրված տրավերտինե հուշատախտակ, պուրակի կենտրոնում լինելու է միջոցառումների գոտի, որը հարմարեցված է հեռուստածրագրերի ու քննարկումների համար: Լինելու են փայտե նստարաններ: Կանաչապատումն իրականացվելու է մշտադալար բույսերով:
Մեր այն հարցին, թե գուցե սեփականատերն ամեն դեպքում նաև սրճարա՞ն է նախատեսել կառուցել, նա հերքեց՝ ասելով, որ այգին Գրողների միությանն է ու նման բան նախատեսված չէ:
Անի Կարապետյան
